Ramil Əliyev: "Mərkəz xətti oyunçularımızın ikili mübarizələrdə uduzmasına baxmayaraq…"
Topaz Premyer Liqasının 24-cü turunda “Rəvan” “Turan”ı 6-2 hesabı ilə məğlub etdi.
Korner.az oyundan sonra keçirilən mətbuat konfransında hər iki klubun baş məşqçilərinin səsləndirdiyi fikirlərlə sizi tanış edir.
Ramil Əliyev, “Rəvan” klubunun baş məşqçisi: “Oyuna çox yaxşı başladıq, ilk qolu vurduqdan sonra davamının gələcəyini düşünürdüm. Lakin öz qapımızda 2 qol gördük. 2-ci hissəyə tam fərqli basladıq, oyunda da, hesabda da üstünlüyü ələ aldıq. Mərkəz xətti oyunçularımızın ikili mübarizələrdə uduzmasına baxmayaraq komandanın oyunundan razı qaldım. Böyük üstünlüklə qalib gəldiyimiz üçün şadam”.
Əfqan Talıbov, “Turan” klubunun baş məşqçisi: “Oyun haqqında çox şey danışmağa ehtiyac yoxdur, hər şey göz qabağında idi. 2-ci hissədə heç nə ilə fərqlənmədik. Amma belə məğlubiyyət olmaz. Asəf Qədiri ilk hissədən sonra ayağındakı ağrı səbəbindən əvəzlənməsini istədi. O başa düşmür ki, ağrısı olsa da sona kimi bu oyunu oynamalı idi. Mövsüm sonunda 5-6 futbolçu ilə yollarımız ayırıb əvəzinə gənc oyunçuları cəlb edəcəyik”.
