Mayın 6-da Birinci Avropa Oyunlarının məşəlinin Azərbaycanın bölgələrinə səyahətinin 10-cu günü ölkənin iki nəhəng çayının – Kürlə Arazın qovuşacağının yerləşdiyi rayonda tamamlandı.
Azərbaycan ədəbiyyatında ictimai satiranın banisi olan Mirzə Ələkbər Sabirin adı verilmiş rayondakı məşəl estafetində iştirak edənlərdən biri olan və regionda güləş ənənələrinin formalaşmasında böyük xidmətləri olan Mirəflan Ağayev estafet və ümumiyyətlə, Birinci Avropa Oyunları ilə bağlı təəssüratlarını paylaşdı:
– Bu Oyunlar artıq Azərbaycanın nüfuzunun dünya səviyyəsində təsdiqidir. Avropada böyük idman ənənələri olan, neçə-neçə olimpiya oyunlarına ev sahibliyi etmiş şəhərlər ola-ola, məhz Bakının, müstəqilliyini cəmi iki onillikdir əldə etmiş Azərbaycanın paytaxtının belə bir şərəfə nail olması da bunu əyani sübut edir, – deyən veteran pəhləvan bildirir.
O, Avropa Oyunlarının Azərbaycanın təbliğatında gözəl vasitə olduğunu qeyd edir:
– Amma bizim üçün bu, həm də Azərbaycan haqqında həqiqətləri Avropaya, dünyaya çatdıran gözəl vasitədir. Tarixdə ilk dəfə keçiriləcək Avropa Oyunlarının təkcə paytaxt Bakını deyil, rayonları da öz qanadı altına alması təqdirəlayiq hadisədir.
Neçə-neçə pəhləvanın ilk müəllimi olmuş, ona yol göstərmiş, həyatda ilk inamlı addımlarını atmağa kömək etmiş güləş fədaisi Mirəflan müəllim təəssüratlarını belə yekunlaşdırdı:
– Onun iştirakçılarından biri olmaq mənim üçün qürur mənbəyi, gözəl xatirədir. Bir məşqçi kimi, Avropa Oyunları yetirmələrimə böyük yarış həyəcanını, olimpiya ehtirasını aşılamaq, beynəlxalq təcrübənin nə olduğunu göstərmək üçün gözəl fürsət olacaq. Buna qədər yalnız sözlə anlatmağa çalışdığımızı indi əyani göstərəcəyik. Bu, yeniyetmə uşaqların olimpiya ideallarına köklənməsinə, böyük amallara qurşanmasına aparan yoldur. Oyunlarda həm də bütün varlığımızla idmançılarımızı qələbəyə səsləyəcəyik.
