19 yaşadək qızlardan ibarət Azərbaycan millisinin baş məşqçisinin kimliyinə böyük ölçüdə aydınlıq gəlib.
Korner.az-ın Apasport.az saytına istinadən verdiyi məlumata görə, bu posta Zamin Əsədullayevin gətiriləcəyi gözlənilir.
Karyerasının böyük hissəsini qadın futbolunda çalışan məşqçi vaxtilə “Gömrükçü” komandası ilə Azərbaycan çempionu olub. Həmin klubda olduğu kimi, U-17 yığmasında da baş məşqçinin köməkçisi olan Əsədullayev Sissi Raytla çiyin-çiyinə işləyib.
Lakin Azərbaycanda keçirilən dünya çempionatından bir müddət əvvəl o, U-17-dən ayrılıb. Bunun səbəbi U-19-un formalaşdırılması üçün seleksiya işinin görülməsi olduğu ehtimal edilir.
AFFA-dan rəsmən bildirildiyi kimi, məsələyə bu gün aydınlıq gəlməlidir. Əsədullayev variantından son anda vaz keçiləcəyi inandırıcı görünməsə də, məhz AFFA-nın rəsmi qərarından sonra komandanı seçmə oyunlara çıxaracaq məşqçi bilinəcək.
