Son bir neçə gündə, daha dəqiq “Real Sosyedad”a məğlubiyyətdən sonra “Barselona”da qəribə hadisələr cərəyan edir. Yəqin ki, bir çoxunuz artıq xəbərdarsınız, bilməyənlər üçün qısaca qeyd edim ki, klubun məşhur futbolçusu Lionel Messi “Real Sosyedad”la matçda onu oyuna əvəzetmədən daxil etdiyi (!!!) üçün baş məşqçi Luis Enrikeyə savaş elan edib. Deyilənə görə, klub prezidenti Bartomeu ilə görüşdə Messi “ya mən, ya o” tələbini qoyub. Argentinalının yeni baş məşqçi namizədi də artıq məlumdr: Frank Raykaard. Bilirsiz, nəyə görə ötən ilin martın baş məşqçi karyerasını bitidrdiyini açıqlayan Raykaard? Klubda ilk dəfə Messiyə etimad göstərib deyə. Əgər deyilənlər təsdiqini tapırsa, bu sadəcə rəzalətdir! Və Batromeu sırf argentinalı belə istəyir deyə Luis Enrikenin müqaviləsinə xitam verərsə, mən onun futbolu birdəfəlik atmasını istərdim.
Məndə əsas narahatlıq doğuran məqam son ilyarımda bu futbolçuda mənfi mənada baş verən dəyişikliklərdir. Halbuki, biz Messini belə tanımamışdıq. Başını aşağı salıb futbolunu oynayan, heç kimlə əlavə polemikaya girməyən, sakit, çəlimsiz insan niyə harınladı? Hər şey 2013-cü ilin yayında başladı. Sonradan özü təkzib etsə də, Tata Martinonun təyinatında Messinin şəxsi nüfuzunun rol oynaması çoxunda şübhə doğurmur. Təcrübəsiz və heç kimin tanımadığı Martionun təyinatı “Barsa”nı 1 il geriyə saldı, mövsümün sonunda rüsvayçılıqla klubu tərk etmək məcburiyyətində qaldı. Elə həmin ərəfədə prokurorluqda Messi ilə bağlı araşdırma başlandı. Bunun səbəbi isə isə məşhur futbolçunun müxtəlif illərdə İspaniya vergi idarələrindən böyük miqdarda pulu gizlətməsi idi. Sonradan bu pulu mərhələli şəkildə geri qaytarması “torbada pişik olması”na işarədir. Növbəti “Messi şıltaqlığı” özünü keçən ili mayında göstərdi. Argentinalı klubun qarşısına şərt qoydu ki, Argentina millisindən komanda yoldaşı S. Aqueronun heyətə cəlb olunsun. “Mançester Siti” həmin vaxt “Barsa”dan 70 milyon avroya yaxın məbləğ tələb etmişdi. Bu keçidin alınmaması həmin vaxt da b öyük söz-söhbətlərə yol açmışdı.
Əlbəttə, Messinin superistedad olmasını, “Barsa” üçün böyük işlər gördüyünü inkar etmək Tanrıya qarşı çıxmaq kimi bir şeydi. Lakin onun getdikcə artan eqosu və təkəbbürü xoş gələcək ifadə etmir. “Barsa” kimi 117 illik tarixi olan bir klubun maraqlarının bir futbolçuya qurban verilməsi komandaya və azarkeşlərə təhqirdir. 2014- cü ili onun üçün Dünya Çempionatının qrup mərhələsindəki fotoaparat işığı kimi qısa müddətli partlayışı istisna etməklə belə xarakterizə etmək olar: FİASKO! Buna rəğmən iyun ayına uzadılan müqaviləyə əsasən onun maaşı 20 milyon avroya qədər artırılır! Bunda klubun da günahı az deyil. “Barsa” prezidentinin “Nə olursa-olsun, Messini satmayacağıq” tipli açıqlamaları futbolçuda özünəəminlik yaradıb. Əslində Bartomeu Messinin nazıyla oynamaqla həm də öz kreslosunu sğortalayır. Çünki Messi gedəcəyi təqdirdə klub cameəsinin böyük tənqidi ilə üzləşəcəyini yaxşı bilir. Əsl problem də elə düşüncə tərzindədir. İnsanlar, elə fikir yaradıblar ki, Messi olmazsa, “Barsa” olmaz. Sanki Messi “Barselona” üçün yox, “Barselona” Messi üçün oynayır.Buna əmin olun: Messidən qabaq da “Barselona” var idi, və ondan sonra da var olacaq. Sizi inandırım, belə fikir formalaşdırılması Messinin özünə ziyandır.Futbolçunun karyerasındakı enişi hiss etmirsiz? Artıq oynadğı futbolla yox, qalmaqalları gündəmə gəlir. Başını aşağı salıb, futbolunu oynayan, çəlimsiz uşaqdan əsər-əlamət qalmayıb…
Ürfan Məmmədzadə
