"Kəpəz"in yeni baş məşqçisi Mahmud Qurbanovun Korner.az saytına müsahibəsi.
-Bir az gec də olsa, sizi yeni təyinatınız münasibəti ilə təbrik edirik.
Çox sağ olun.
-Düzdür hələ Premyer Liqada 3 həftə arxada qalıb. Buna baxmayaraq "Kəpəz" 0 xalla sonuncu yerdədi. Komandanı irəli aparmaq sizə çətin olmayacaq?
Vallah, çətin də olsa, asan da olsa, hal-hazırda bu klubun baş məşqçisi mənəm. Komandaya cavabdeh olan da mənəm. Çalışacağıq ki, komandanı qabağa aparaq. Gedən futbolçularımız oldu. Belə götürəndə komandaya futbolçu cəlb olunmayııb. "Transfer pəncərəsi"nin bağlanmasına az vaxt qalması işimi çətinləşdirir. Bilirsiz, sanballı futbolçuların da bu dəqiqə müqavilələri var. Çətin odur ki, futbolçu seçmək imkanım yoxdur. Bizdə çoxu cavan uşaqlardır. Cavanlara üstünlük vermişik. Amma neyləyə bilərəm? Olanımız budu. Yeri gəlmişkən, komandaya lazım olmayan futbolçuları da kənarlaşdırdıq. Hansı ki, can yandırmırlar, oynamaq istəmirlər, onları göndərdik. Belə futbolçular bizə lazım deyil.
– Can yandırmayan futbolçular kimlər idi?
Lyubo Baranin, Qoqa Beraya, İrakli Beraya və Renat Sultanov. Hələ ki bunlar idi.
– Bundan sonra yenə də futbolçu göndəriləcək?
Ola bilər niyə olmur. Ancaq gərək mən onların yerinə də futbolçu tapam.
– Lyubo Baranin komandadan bir az qalmaqallı ayrıldı…
Sözün açığı, mən bu barədə çox şeyi bilmirəm. Ancaq bildiyim odur ki, Lyubo Baraninin futbol oynamağı problem idi. Ümidləri doğrultmadı, yerlilərdən bir baş üstün olmalı idi, cavanlara nümunə olmalı, onları öz arxasınca aparmalı idi. Lakin o, heç nə ilə yadda qalmadı. O, vaxtını keçirtməyə gəlmişdi. Vaxtını keçirən futbolçunun da nəinki "Kəpəz"də, heç bir klubda yeri yoxdur.
-Yay "transfer pəncərəsi"nin bağlanmasına çox az müddət qalıb. "Kəpəz"də yeni oyunçu görə bilərik?
Ola bilər. Amma sanballı futbolçu inanmıram. Yəni çox da güclü futbolçu olmayacaq, məncə. Çünki yaxşı futbolçuların hamısının müqaviləsi var. Çempionat da başlayıb. Amma axtarışdayıq. Mən özüm də axtarıram. Vaxtımıza az da olsa, var hələ.
– Legionerlərə, yoxsa yerli futbolçulara üstünlük verəcəksiz?
Əlbəttə, yerli. Cavan, yerli uşaqlarla baxımlı futbol oynayan klub formalaşdırmağa çalışırıq.
– Əlinizdə olan futbolçularla nə qazanmaq olar?
Reallıq budur ki, əlimizdə olan futbolçular budur. İndi biz də çalışırıq nəsə edək. Nə dərəcədə alınacaq-alınmayacaq, bunu zaman göstərəcək. Yaxşı futbolçu tapmasaq da, onsuz da, komandanın arxasında durmuşuq, dəstəkləyirik.
– Həftə sonu "Bakı"ya qarşı səfərdə sizi çətin oyun gözləyir…
Düzdü, xalımız yoxdur. Amma nəinki "Bakı", biz bütün oyunlara 3 xal əzmi ilə çıxacağıq. Əlimizi aşağı salıb, çiyinlərimizi büküb məğlub olmaq fikrimiz yoxdur.
Hidayət QURBANOV
