Ağcabədi şəhər stadionunun ərazisi hissə-hissə satılır.
Korner.az-ın məlumatına görə, bu barədə müsavat.com-a rayon sakinləri məlumat veriblər.
Stadionun satılmasında rayon icra başçısı Şahin Məmmədov və onun birinci müavini Rövşən Əhmədovun adı çəkilir. İndiyə qədər edilən çoxsaylı şikayətlər nəticəsiz qalıb.
Əldə olunan faktlar məlumatın doğru olduğunu sübut edib. Araşdırmalar nəticəsində o fakt üzə çıxıb ki, stadionun ərazisi Lətafət Həsənova adlı şəxsə satılıb.
Şəkillərdən də aydın görünür ki, stadiona aid olan ərazidə obyekt tikilib. Həmin tikilinin ön tərəfi stadionun divarı tərəfdir, tam hazır olandan sonra divar söküləcək.
Amma bundan başqa əraziyə daxil olan digər yerlər də satılıb, ancaq hələ ki, tikinti başlamayıb,bünövrəsi salınıb.
Görüntülərə baxanda stadionun bərbad gündə olması, təmir işləri aparılmadığı da görünür. Mərkəzi stadionun hissə-hissə satılması və stadionun bərbad gündə olması rayon əhalisini ciddi narahat edir. Sakinlər bu özbaşınalığa son qoyulmasını, stadionda tikilən obyeklərin sökülməsini, stadionun təmir edilməsini tələb edirlər. Məlumat verən şəxslər onu da qeyd ediblər ki, yaxın günlərdə sakinlər baş verənlərlə bağlı stadionun ərazisində aksiya keçirəcəklər.