“UltraAslan” və “UltraNeftçi” fan-klubunun rəhbəri Ceyhun Əzizlinin Korner.az-a müsahibəsi.
– Bir neçə gün əvvəl millinin Luksemburqla oyunu keçirildi. Nəticə səni qane elədi?
Biz elə gəlirdi ki, biz Lüksemburqu udub, güclü olacağıq. Amma "cırtdan" ölkəni udmaqla güclü ola bilmərik. Bu gün bizim millinin problemi futbol problemi deyil, nə də Foqts problemi deyil. Artıq futbolda biz "cırtdan ölkə" adını almışıq. Biz bu cür olmamalıyıq axı. Xalq hər şeyi görür, biz bundan artığını bacarmırıq. Adından da göründüyü kimi, "yığma"dı, amma bizim milliyə baxın. Meneceri güclü olanlar, gəlib millidə oynayır. Bunun da günahı Foqtsda deyil, rəhbərlikdədi.
– Bir azarkeş kimi Ruslan Abışovun "İstefa qışqıran azarkeş stadiona gəlməsin" fikrinə münasibətin?
Bu sözü ilk dəfə sizə deyirəm, mən Rusan Abışova görə Tahir Süleymanovdan o qədər söz eşitmişəm ki… Abışov "Xəzər Lənkəran"a gedəndə onlar mənə deyirdilər ki, "o, pula satıldı, getdi Lənkərana. Çıx bir açıqlama ver ki, Abışov satıldı". Mən deyirdim ki, Ruslan satılmayıb, ölkəmizin başqa komandasına getdi. Peşəkar futbolda bunlar adi haldı. Amma həmin açıqlamasına görə mən Abışova tək söz deyə bilərəm – ayıb olsun! Azarkeş xalqdı, xalqın da gözü tərəzidi. Sənin ixtiyarın yoxdu ki, belə söz deyəsən. Abışov, Luksemburqu uda bilməyən komanda futbol oynamamalıdı.
-"Neftçi"nin qarşıdan Çempionlar Liqası oyunları gəlir. Və bir neçə fanklub komandadan küsüb…
Bilirsiniz, "Neftçi" 300-400 nəfər demək deyil. "Neftçi" fanklub komandası deyil, xalqın komandasıdı, amma rəhbərlikdə oturan insanlar "Neftçi"ni xalqa düşmən eləyir. Bu gün "Neftçi"dən küsənlər yenə ürəkləriylə dəstək verir. Heç futbolda adam adamı döyər? "Bakı"nın oyunçusunu döyürsən, "Xəzər Lənkəran"ın futbolçuarını döyürsən… Belə futbol olmaz. Dalaşmaq istəyirsən, oyundan sonra get başqa yerdə dalaş, amma meydanda yox.
– "UltraNeftçi"nin fəaliyyətini dayandırmasına səbəb nə və kim oldu?
Bizim bir vitse-prezident var. Adı Tahir Süleymanovdu (gülür)… Keçmiş hakimdi. Yaşlı insanlara sual verin, əgər desələr Ceyhun səhv deyir, mən bir daha danışmaram. Hakim olub, bunu heç kim danmır. "Neftçi"nin düşməni olub bu adam. İndi "Neftçi" üçün nə iş görə bilər? Oyundan əvvəl Tahir Süleymanova deyəndə ki, forma verin, deyirdi, oyundan sonra gəl, götür. O adam bu cürdü.
– Televiziya verilişlərinin birində "Neftçi"nin İctimaiyyətlə Əlaqələr Departamentinin rəhbəri Gündüz Abbaszadə azarkeşlərin stadiona tum çırtlamağa gəldiyini demişdi. Sən nə düşünürsən?
– Bilirəm, izləmişdim həmin verilişi. "Neftçi"nin mətbuat departamentində lazımi qədər işçi var. Sizdən xahişim budur ki, bunu qeyd eləyəsiniz: Gündüz Abbaszadənin işçilərindən bir dənə fanklub yaratmaq olar. Başqa klublardan mənə işləmək təklifi gəlib. Ancaq bunu qəbul etmədim. Bəs qədər pul da verirdilər. Hal-hazırda işsizəm, amma "Neftçi"dən başqa heç bir klubda fanklub rəhbəri işləmərəm. Qapıçı işləyərəm, topdaşıyan işləyərəm, amma fanklub rəhbəri yox. "Neftçi"də də bu rəhbərlik olduğu müddətdə işləmərəm. BU rəhbərlik getsin, "Neftçi"də nə iş olsa, görərəm. Bu gün futbol adamlarının əksəriyyəti futbolu bilmir. Bayaq kubokdan danışdıq. Kubokun finalında baş verənlər heç də xoşuma gəlmədi. Hamı deyir, təhlükəsizlik xidməti günahkardı. Amma, təsəvvür edin, mən həmin təhlükəsizlik xidmətinin işçisiyəm. Mən əmri kimdən alıram? Rəhbərlikdən. Bəs onda bir zibili çıxanda niyə işçilərin üstünə yıxırlar məsələni? İşçiyə sən deməsən get onu vur, o da vurmaz. "Xəzər Lənkəran"ın pulu da var, şəraiti də. 5000 min mühafizəçi tuta bilər. Amma mənə çatmır, futbolçunu xalqdan qoruyuruq?
Azərbaycan futbolu üçün "Bakı" və "Qəbələ" çox iş gördü. Mən istərdim, bütün klub rəhbərləri Hafiz Məmmədov kimi, Tale Heydərov kimi olsun. İstərdim, AFFA-nın rəhbəri də Hafiz Məmmədov olsun. Mən Rövnəq müəllimin düşməni deyiləm, sadəcə futbol onluq deyil. Çünki Rövnəq müəllimin ətrafına yığdığı kollektiv Azərbaycan futbolunun inkişafını istəmir. Əgər rəhbərlik dəyişsə, biz bundan sonra uğursuzluqdan yox, sevincdən qələbədən danışacağıq.
