Milli komandaların oyunları ilə əlaqədar Azərbaycan Premyer Liqasında fasilə yarandığından “Qəbələ” futbolçuları istirahətə buraxılıb.
Korner.az-ın klubun saytına istinadən yaydığı xəbərə görə, XXVI turun “İnter”lə səfər oyunundan (2:1) sonra bəzi legionerlər vətəninə yollanıb, yerli oyunçular isə düşərgədən ayrılıb. Baş məşqçi ukraynalı Roman Qriqorçuk və bəzi legionerlər fasilə dövründə də Azərbaycanda qalmağa üstünlük verib.
Fasilədən sonra baş tutacaq ilk turu buraxacaq “qırmızı-qaralar” hazırlıqlarını martın 23-də bərpa edəcək. Həmin gün Qriqorçukun komandası Qəbələdə axşam məşqinə çıxacaq. Lakin millilərin düşərgəsində olan futbolçular hazırlıqlara qatılmayacaq.
Qeyd edək ki, “Qəbələ” növbəti oyununu aprelin 5-də AZAL-a qarşı keçirəcək. XXVIII tur çərçivəsindəki qarşılaşma səfərdə baş tutacaq.
