“Hazırlığımız plan üzrə gedir. Yalnız Baçana Sxadadze ilə Asif Məmmədovun xırda zədələri var. Coşqun isə bugünkü oyunda zədələndi. Onun durumunun necə olduğunu hələ bilmirik”.
Korner.az-ın məlumatına görə, bu sözləri “İnter”in baş məşqçisi Kaxaber Sxadadze bu gün “Kasımpaşa” ilə yoxlama oyunundan sonra jurnalistlərə açıqlamasında deyib.
Gürcü çalışdırıcı Superliqa təmsilçisi üzərində qazanılan qələbənin əhəmiyyətli olduğunu söyləyib: “İstər yoxlama oyunu olsun, istər rəsmi oyun, qazanılan qələbə xoşdur. Futbolçunun psixoloji hazırlığında qələbə hər zaman önəmlidir. Ancaq bu qələbədən eyforiyaya qapılmamalıyıq”.
Sxadadze Gürcüstan millisi ilə müqavilə imzalamasından da danışıb: “Mən çox xoşbəxtəm ki, Cahangir Hacıyev kimi sponsoru olan klubu çalışdırıram. Gürcüstan millisindən təklif gələndə o, öz maraqlarını geri, mənim maraqlarımı isə ön plana çəkdi. Hacıyev kimi sponsor mində, bəlkə də yüzmindəbir nəfərdir”.
