Dünən AFFA-nın inzibati binasında baş katib Elxan Məmmədov və Peşəkar Futbol Liqasının prezidenti Ramin Musayevin Azərbaycan Premyer Liqasında çıxış edən klubların rəhbərliyi ilə keçirdiyi görüşdə iştirak edən "Kəpəz"i vitse-prezident Kamran Hüseynov təmsil edib.
Korner.az-ın məlumatına görə, Hüseynov tədbirlə bağlı fikirlərini klubun rəsmi saytına bölüşüb:
"Düşünürəm ki, görüş işgüzar şəraitdə keçdi. AFFA və PFL-in rəhbər şəxsləri ilə yığıncaqda bir çox məsələləri müzakirə edib, birgə fikir mübadiləsi apardıq. Çempionatın keçirilməsi sistemi, legioner limiti və s. məsələlər haqda danışdıq.
Yəqin artıq siz də xəbər tutmusunuz ki, bu görüşdə Gəncə və Tovuzdakı stadionların ot örtüyünün dəyişdirilməsi haqda qərar qəbul olunub. Bunun cari çempionatın sonunda, may ayından başlayaraq həyata keçirilməsi nəzərdə tutulub. Ümumilikdə, səmərəli alınan belə görüşün mütamadi təşkili nəzərə alındı."
