"Komandaya bacarığı olmayan, bədən tərbiyə müəllimi səviyyəsində olan Cüneyt Beçer gəldi"
"Bu saytda öz yazdıqlarımıza görə məsuliyyət daşıyırıq, şərhlərə fikirlərə görə yox. O yazılarda Kamran haqqında heç bir etikadan kənar ifadə yazılmayıb. Ola bilsin ki, hansısa şərhdə onun komandadan uzaqlaşdırılması qərarı ilə əlaqədar əleyhinə fikir bildirilib. Qaldı ki şərhlərə, bizim saytımızı yarım milyondan çox insan izləyir. İstər "Xəzər-Lənkəran" azarkeşləri, istər mətbuat, istər kənar şəxslər. Onlarıq 90%-ni şəxsən tanımırıq. Azarkeşlər öz fikirlərini bildirirlər, saytın qaydalarına əsasən etik normalara uygun olanın saxlayırıq. Müəyyən kütlə getməyinə sevinibsə ona biz məsuliyyət daşıya bilmərik".
Bu sözləri Korner.az-a açıqlamasında "12-ci oyunçu" saytının redaktoru İslam Cabbarlı deyib. O, Kamran Ağayevin verdiyi açıqlamalara münasibət bildirərkən azarkeşlərinin ondan soyumasının səbəbini belə açıqladı:
"Azarkeşlərlə klub arasında əsas rolu komanda oynayır. O komandada birlik, kollektiv, nəticə var idi. Həmin vaxtlar bütün azarkeşlər Mirça Rednikin başına and içirdi. Məşqlər zamanı azarkeşlərdə belə fikir yaranırdı ki, qapıçı ilə baş məşqçi arasında soyuqluq var. Sonra məlumatlar gəldi ki, Avstriyada təlim-məşq toplanışında hadisə baş verib. Rednik Rumıniya milli komandasının qapıçısınını düşərgəyə dəvət edib, bu isə Kamrana pis təsir edib, əlcəklərini atıb, Avstriyadan gedəcəyini bildirib. Sonra bir hadisə də olmuşdu. "Makkabi" ilə oyundan öncə məşq bitəndən sonra Kamran azarkeşlərin yanında demişdi ki, günahkar baş məşqçidi, Avstriyada heyəti dəyişmək lazım deyildi. Komanda arasında olan söhbəti azarkeşlərə bildirməsi özü bir soyuqluq yaratdı. Sonra hadisələr ard-arda baş verdi, "Bakı" ilə oyunda Parksla üz-üzə qalan Kamran qəribə halda yıxıldı Parks vurdu, 2:2 bitdi. O oyunda ki, qələbə qazanacaqdıq. Çox təsir etdi. "Neftçi"ilə oyunda zədə adıyla çıxmadı oyuna, 0:5 hesabı ilə uduzduq. 6 nəfər futbolçu klub prezidentinə Rednikdən şikayət etmişdi, onların arasında ilk olaraq Kamranın adi çəkilirdi. Baş məşqçi getdi, komanda yarımçıq qaldı. Bir o qədərdə bacarığı olmayan, bədən tərbiyə müəllimi səviyyəsində olan gəldi. Azarkeşlərlə komanda arasında uçurum yarandı. Bununda səbəbkarı komanda oldu. Komandada bu söhbətlərin səbəbkarı Kamranı görürdük".
İ.Cabbarlı sonda Ağayevin dilinin güdazına getdiyini və azarkeşlərin rəğbətini lazımsız açıqlamaları ilə itirdiyini vurğuladı:
"Bütün bu hadisələr sözə dayanır. Yəni o, söz deməsə, insanlar da onun haqqında pis fikirləşməzlər. Həzrət Əlinin (ə) bir kəlamı var: "Söz nə qədər deyilməyib sənin əsirindir, dedinsə oldun onun əsiri". Daha yaxşı olardı ki, deməsin. A bala, başın bəla çəkir dinmə də. Nə qədər onu müdafiə etmişəm saytımızda. Elə bir futbolçu yox idi ki, onun qədər müsbət fikirlər bildirilsin, reytinq toplayan futbolçu olub. Komandanın kapitan olaraq motivasiya etmək bacarığı vardı. Mən dəfələrlə fanatlarla görüşün təşkil etmişəm. Necə dəfə yanımda fanatlarla danışanda kənarlaşıb işarə etmişəm ki, bunu de, onu demə. Söz var ki, danışmaq gümüşdürsə, susmaq qızıldır. Bütün problemlemi danışmağı idi. Gərək danışmayaydı!"
RÖYA
![](https://korner.az/wp-content/uploads/2018/06/korner-logo.png)