`Qarabağ` komandasının azarkeş qrupu olan `İmarət` fan-klubu 2012-ci ilin yekunlarıyla bağlı tədbir keçirib.
Korner.az xəbər verir ki, daim azarkeşinin yanında olan `Qarabağ` Futbol Klubu rəhbərliyi bu dəfə də ənənəsinə sadiq qalıb. Belə ki, baş tutan tədbirə `Qarabağ` Futbol Klubunun vitse-prezidenti Tahir Gözel, direktoru Emrah Çelikellə yanaşı məşqçi və futbolçu heyətindən iştirak edənlər vardı. Tədbirdə ilk nominasiya klubumuzun başqanına verilib. Tahir Gözəl ötən mövsüm, 03.03.2012-ci il tarixində Ağdamda keçirilən `Qarabağ`-AZAL oyununun 58-ci dəqiqəsində azarkeşin `Qarabağ eşqinə hər kəs ayağa` şüarına öz səmimiliyi,sadəliyi və Qarabağ sevərliyi ilə cavab verərək ayağa qalxmış, azarkeşi alqışlamışdır. Azarkeş `Ən böyük başqan bizim başqan` dedikdə isə Tahir bəy bir daha ayağa qalxaraq `Ən böyük Qarabağ` deyib, əli ilə meydandakı komandamızı işarə vermişdir. Bu hadisədən sonra İmarətçilərin könlündə taxt quran Tahir bəy azarkeşin istəyinə hörmətlə və sayqıyla yanaşmış,komanda da atdığı addımlarda da azarkeşin fikrini nəzərə almışdır. Belə də başqanımıza `İmarət`in fəxri üzvü` mükafatı verilmişdir. Ardınca danışan Tahir bəy ona verilən bu hədiyyənin onun üçün böyük əhəmiyyəti olduğunu və `Qarabağ` ailəsinin fərqinin özəlliyindən danışdı. `Qarabağ`ın bir ailə olduğunu və 2001-ci ildən rəhbərlik etdikləri komandanın artıq həsrətində olduğu çempionluğa qovuşmasının zamanı gəldiyini vurğuladı. Bu mövsüm `Qarabağ`dan konkret çempion gözlədiyini söyləyən başqan, bunun üçün camiənin bir yumruq kimi birləşməsinin gərəkdiyini bildirdi. Başqan eyni zamanda komandasının yaxın illərdə hədəf kimi Avrokuboklarda qrup mərhələsinə düşmək olduğunu vurğuladı. `Qarabağ`ın məşqçisi Müşviq Hüseynova `İmarətin yadigarı` xatirəsi təqdim edildi. Eyni zamanda `Qarabağ` qazısı Rey Kərimoğlu da `İmarət`çilərdən öz mükafatını aldı. Tədbirdə eyni zamanda azarkeşlər seçimi əsasında İlin ən yaxşı jurnalsiti Sərxan Musayev (Futbol+), ən yaxşı sayt (qol.az), İlin transferi Riçard Almeyda, azarkeşin sevimlisi İlqar Qurbanov, ilin ən yaxşı qolu Vüqar Nadirov öz mükafatlarını aldılar. Tədbirin sonunda `Qarabağ`ın başqanı Tahir Gözəl media mənsublarının müxtəlif səpgili suallarını cavablandırdı.
Qeyd: Tədbirin sual-cavab hissəsi saytımızda dərc ediləcək.
