İ.Kandelaki: “Bu, absurd ittihamdır”

"İnter"-"Xəzər-Lənkəran" oyunundan sonra  məlumat yayılmışdı ki,  “İnter”in müdafiəçisi İlia Kandelaki rəqib komandanın üzvü Sadio Tounkaranın ünvanına guya irqçi ifadələr söyləmişdir. Korner.az– ın məlumatına görə, hadisə ilə bağlı İlia Kandelaki klubun rəsmi saytına münasibət bildirib.

-“Bəzi idman saytları məni rəqibin ünvanına irqçi ifadələr işlətməkdə günahlandırırlar. Guya mən onu ciddi şəkildə təhqir etmişəm. Bu, absurd ittihamdır. Bilirsiniz ki, “Xəzər-Lənkəran”la qarşılaşma həmişə gərgin keçir. Oyundan sonra meydanda mənimlə qonaq komandanın üzvü Sadio Tounkara arasında yaşanmış mübahisəni təhqir kimi yox, anlaşılmazlıq kimi qiymətləndirmək lazımdır. Mən Avropa klublarında müxtəlif irqlərə məxsus futbolçularla yanaşı futbol oynamışam və kimsəni də dərisinin rənginə görə təhqir etməmişəm. “İnter” beynəlmiləl komandadır və dərimizin rəngindən asılı olmayaraq bir-birimizə həmişə hörmətlə yanaşırıq”.