Hannes Halldorsson: “Penaltilər seriyasına hazıram”
13.08.2018 , 16:10
“Penaltilər seriyası lotereya kimidir. Həmin anda rəqibin fikirlərini oxumaq lazımdır”.
Bu sözləri “Qarabağ”ın qapıçısı Hannes Halldorson Çempionlar Liqasının III təsnifat mərhələsinin BATE ilə cavab qarşılaşmasından öncə deyib. Belarus mətbuatına danışan 34 yaşlı qapıçı DÇ-2018-də İslandiyanın heyətində Argentina ilə matçda Lionel Messinin penaltisini dəf etməsindən də danışıb:
“DÇ-2018-də Argentina ilə oyunda Messinin penaltisini dəf etmişdim. Həmin an karyeramın ən parlaq dönəmlərindən biridir. O epizodu hazırda düşünmürəm, amma olduğum yerlərdə insanlar bunu mənə xatırladırlar. Penalti zamanı təzyiq hiss etmirəm. BATE ilə oyun 11 metrlik cərimə zərbələrinə getsə, buna hazıram”.
BATE – “Qarabağ” matçı avqustun 14-də keçiriləcək və saat 21:00-da start götürəcək.
Bakıdakı ilk oyunda “Qarabağ” 0:1 hesabı ilə uduzub.
