Bu gün “Bakı” Futbol Klubunun prezidenti Hafiz Məmmədovun yubileyidir.
Korner.az-ın məlumatına görə, 50 illiyini qeyd edən Hafiz bəy ölkə idmanı və Azərbaycannın bütün dünyada tanınması istiqamətində bir sıra işlər görüb.
AFFA İcraiyyə Komitəsinin də üzvü olan Məmmədov “Land of fire Azerbaijan” (Odlar Yurdu Azərbaycan) brendinin Madridin “Atletiko” və Fransanın “Lans” klublarının forma reklamı olmasına nail olub.
1964-cü il dekabrın 2-də Naxçıvan Muxtar Respublikasının Naxçıvan şəhərində anadan olan Hafiz Məmmədov 1971-1981-ci illərdə Naxçıvan şəhəri 3 saylı orta məktəbində təhsil alıb. Orta məktəbi müvəffəqiyyətlə bitirərək 1981-ci ildə Azərbaycan Dövlət Xalq Təsərüfatı İnstitutuna daxil olub, 1985-ci ildə bu ali tədris müəssisəsinin mühasib ixtisasına yiyələnib.
1985-86-cı illərdə Dövlət Yeyinti Sənayesi Təşkilatının Sabunçu rayon şöbəsində mühasib, 1987-88-ci illərdə Naxçıvan MR-nın Dövlət Sənaye Nazirliyində iqtisadçı vəzifəsində işləyib.
1988-92-ci illərdə Naxçıvan MR-nın Naxçıvan şəhərində “Əmanət” bank idarəçiliyində kredit şöbəsinin rəhbəri vəzifəsini icra edib.
1992-95-ci illərdə “Sənan” kiçik müəssisəsində baş menecer, 1995-97-ci illərdə “Alfa plyus” Kommersiya Təşkilatında baş menecer, 1998-ci illərdə “Baghlan Traiding” şirkətinin direktorlar şurasının sədri olub.
2001-ci ildən “Baghlan General Traiding” MMC- də baş menecer vəzifəsində fəaliyyətə başlayıb.
2003- cü ildən bu günədək “Baghlan Group FZCO”nun prezidentidir.
2004-cü ilin noyabr ayından etibarən “Bakı” Futbol Klubunun prezidenti, 2005-ci ildən AFFA İcraiyyə Komitəsinin üzvüdür.
Azərbaycan, rus və ingilis dillərində sərbəst danışır. Ailəlidir 3 övladı var.
Korner.az adından Hafiz bəyi yubileyi münasibəti ilə təbrik edir, ona möhkəm cansağlığı və işlərində uğurlar arzulayır.
