"Neftçi"nin Mətbuat və İctimaiyyətlə Əlaqələr Departamentinin rəhbəri Gündüz Abbaszadə bugünkü kubok oyunundan sonra baş vermiş insidentdə klubun idman direktoru Güloğlan Cabbarovun adının hallandırılmasına münasibət bildirib.
Korner.az-ın məlumatına görə, Abbaszadə Güloğlan Cabbarovun dava-dalaşla əlaqəsinin olmadığını bildirib.
"Biz Toşak kimi təcrübəli məşqçilərin Azərbaycanda işləməsini alqışlamışıq. Ancaq onun bugünkü hərəkəti o yaşa, o təcrübəyə yaraşmadı. Oyundan sonra Saşa Stamenkoviçə yaxınlaşıb ingiliscə ağır söyüşlər işlətdi. Saşa ingiliscə pis bilir, bizim qapıçılarla işləyən məşqçimiz Neboşa Toşakın söyüşlərinə reaksiya verdi. Ardınca Toşakın oğulluğu, həm də köməkçisi Aleksi Plaza araya girib Neboşaya ispanca söyüşlər söyməyə başladı və ortalıq qızışdı. Biz araya girdik ki, sakitləşdirək. Qoy ittiham eləsinlər. Amma hər şey ortadaydı: aranı qızışdıran Toşak oldu. Bu cür ab-havanı, bu cür oyunu zibil etdi".
