Dünən Çempionlar Liqasının II təsnifat mərhələsində “Skenderbeu” ilə “Neftçi” arasında keçirilən oyununda “Neftçi”nin keçmiş idman direktoru Güloğlan Cabbarovun klub rəsmiləri arasında görünməsi sosial şəbəkələrdə geniş müzakirələrə səbəb olub.
Güloğlan Cabbarov “Qafqazinfo”ya verdiyi açıqlamada sadəcə olaraq “Neftçi”ni dəstəkləmək məqsədilə orada olduğunu deyib: “Neftçi” klubunun prezidenti Sadıq Sadıqovla sıx dostluq əlaqələrimiz var. O, hardadısa, mən də orda oluram. Bu tam təbii bir şeydi. Çünki dostlar bir-birini yalnız buraxmır. Həm də “Neftçi” bizim doğma klubumuzdur, mən də azərbaycanlıyam və bu məqsədlə də “Neftçi”ni dəstəkləməyi özümə borc bilirəm. Mənim “Neftçi” loqosunu daşıyan kosyumda olmağım isə “VIP zonada”dan matçı izləməyimlə bağlıdır. Mən erməni klubunu dəstəkləməyə getməmişəm ki, “Neftçi”ni dəstəkləmişəm”.
