“İnter”PİK-in prezidenti Georgi Nikolov bu gün radio “İnter”in efirində yayımlanan “Küncdən zərbə” verilişinin qonağı oldu.
Korner.az-ın məlumatına görə, proqramın gedişində G.Nikolov müxtəlif mövzulara toxundu. “İnter”in cari mövsümdəki çıxışı barədə cənab Nikolov bunları dedi: “Hazırda komandamız turnir cədvəlində 2-ci yerdədir. Lakin bu o demək deyil ki, biz çempion ola bilmərik. Bizim yaxşı şansımız var. Ümumilikdə, komandanın çıxışından razıyam. Ötən tur “Bakı” komandasıyla qarşılaşdıq və çox vacib qələbə qazandıq”.
Bundan başqa, prezident “İnter”in ötən çempionluqlarını da xatırladı: “Klubumuz iki dəfə ölkə çempionu olmuşdur və hər iki qələbə son turda qazanılmışdı. “Qarabağ”ın yarımmüdafiəçisinin (Zaur Həşimov-red.) “Olimpik”in qapısına vurduğu fantastik qolu hələ də xatırlayıram. Həmin qol sayəsində biz çempion olmuşduq. Bundan başqa, ikinci çempionluq da bizə son turda və çox gərgin mübarizə nəticəsində nəsib olmuşdu”.
G.Nikolov çempionatın formatının dəyişdirilməsi məsələsinə də toxundu: “Mən “altılığ”ın mənfi tərəfləri barədə tez-tez danışırdım və çox şadam ki, çempionatın belə formatda keçirilməsinə son qoyulacaq. Bir qədər təəssüf doğurur ki, Premyer Liqanı iki əyalət klubu tərk edəcək, ancaq ümumilikdə klubların sayının 10-adək azaldılmasından sonra çempionatda yalnız yaxşılar qalacaq”.
Sonra klubun rəhbəri yerli legionerlər barədə verilən sualları cavablandırdı: “Düşünmürəm ki, Azərbaycan futbolunda legionerlərin olması pis haldır. Bir baxın, görün Bryus Abdulaye necə çxış edir! Bəs Nikolas Kanales “Neftçi” üçün nə qədər qol vurmuşdur! “Rəvan”ın futbolçusu Mindauqas Kalonas isə yerli çempionata əla uyğunlaşdı. Belə futbolçular çempionata əlavə çalar qatırlar, onlarla yanaşı oynayan yerli futbolçular da həmin futbolçulardan nəsə öyrənə bilərlər”.
