“Qəbələ”nin braziliyalı legioneri Dodo klubunun rəsmi saytına müsahibə verib.
Korner.az-ın məlumatına görə, müdafiəçi zədədən sonra komandaya qayıtması və klubun hədəfləri barədə danışıb.
– Bir neçə gün zədəyə görə məşqlərdən kənar qaldınız. İndi özünü necə hiss edirsiz?
– Hər şey qaydasındadır. Özümü yaxşı hiss edirəm. Qısa fasilədən sonra yenidən komandaya qayıtmaq, meydançaya çıxmaq sevindiricidir. Buradakı atmosfer psixoloji cəhətdən də mənə müsbət təsir edir. Bir sözlə hər şey əladır.
– Qısa müddət də olsa meydançadan kənar qalmaq, komandanı kənardan izləmək sizə necə təsir edirdi?
– Futbol mənim üçün sadəcə iş deyil, futbol həyat tərzimdir. Ona görə futboldan az müddət də olsa kənar qalmaq mənə ağır gəlir. Məşq etməyi, çalışmağı sevirəm. Komandadan kənar qalmaq çox çətin və sıxıcı idi. Yaxşı başa düşürəm ki, məşqlərə ara vermək futbolçuya, nəticədə isə komandaya mənfi təsir göstərir. Artıq məşqlərə başlamışam. Bu mənim üçün yenidən doğulmaq kimidir.
– Qarşıda “Qəbələ”ni çətin marafon gözləyir. Özünüzü fiziki və psixoloji cəhətdən çempionata hazır hesab edirsiz?
– Çempionatın bitməsindən sonra məşqlərə bir aydan artıq ara verməyimə baxmayaraq, fiziki baxımdan yaxşı durumdayam. Bütün fiziki testlərdən də uğurla keçmişəm. O ki qaldı psixoloji duruma özümü çox rahat hiss edirəm. Klub rəhbərliyi arxamızdadır, daim bizi diqqət mərkəzində saxlayırlar, problemlərimizlə maraqlanırlar, bizi darıxmağa, sıxılmağa qoymurlar. Ailəmdə də vəziyyət yaxşı olduğuna görə bütün diiqətimi futbola yönəltmişəm.
– Hazırlıq prosesi necə gedir? Fikrincə komanda çempionatın startına kimi tam hazır olacaq?
– Hazırlıq prosesi yüksək tempdə davam edir. Kollektivdə yüksək əhval-ruhiyyə hökm sürür. Gündəlik məşqlərimizi izləyərək bunun şahidi ola bilərsiniz. Hər gün biraz daha müsbətə doğru irəliləyiş olur. Artıq Sloveniyada iki yoxlama oyununda gücümüzü sınamışıq. Düzdür, hər iki oyunda məğlub olduq. Amma indiki vəziyyətdə belə nəticələri normal saymaq olar. Komandada yeni futbolçular var və onların heyətə uyğunlaşması üçün müəyyən zamanın keçməsi mütləqdir. Əminəm ki, çempionatın startına kimi istədiyimiz hazırlıq səviyyəsini yaxalayacağıq.
– Arxada qoyduğumuz mövsümdə komandanın liderlərindən idiniz. Sizcə növbəti futbol ilində də komandanı arxanızca apara biləcəksizmi?
– Futbol komanda oyunudur. Əgər keçən il hər hansı uğurum olubsa, bunu kollektivə görə qazanmışam. Oyunumun yaxşı alınmasında hər bir futbolçunun, məşqçilər korpusunun əməyi var. İnanıram ki, növbəti mövsümdə gücümüzü ortaya qoyub istədiyimiz nəticələri qazanacağıq. Mən bunun üçün əlimdən gələnin 100 faizini ortaya qoyacam.
– Komandaya bir neçə yeni futbolçu cəlb olundu. Fikrinizcə yeni transferlər komandaya hədəflərinə çatmaqda yardımçı ola biləcəkmi?
– Buna şübhəm yoxdur. Yeni transferlər komandadakı boşluqları doldurdular. Xüsusən müdafiə xəttimiz çox gücləndi. Qalır bircə komplektləşmək. Hamılıqla çalışıb bu missiyanın da öhdəsindən layiqincə gələcəyik.
