Bu gün milli komandamıza daha bir yeni futbolçunun çağırılması barədə xəbər vermişdik. Söhbət Eddi Silvestr Paskual İsrafilovdan gedir.
Korner.az yığmamızda debüt edə biləcək bu futbolçu barədə internet resuslarda apardığı araşdırmanın nəticəsini təqdim edir.
Eddi Silvestr Paskual İsrafilov – 2 avqust 1992-ci ildə doğulub. Yarımmüdafiəçidi. Boyu 187 santimetrdi.
Atası toqolu, anası azərbaycanlıdı. İspaniya vətəndaşlığına da sahib olması ona həm bu, həm də ata və anasının doğulduğu ölkələrin millilərində oynamaq şansı qazandırır.
İnternet məlumatlarına insansaq, uşaqlıq dövrü çətin keçib. Hətta 16 yaşında ikən həddi-büluğa çatmamış cinayətkarlar üçün tərbiyə müəssisəsinə düşdüyü qeyd edilib. Təəssüf ki, səbəbi barədə hər hansı məlumat yoxdu.
Futbol oynamağa “Milan”ın İspaniyadakı akademiyasında oynamaqla başlayıb. Lakin burda özünü göstərə bilməyib və Almeriya şəhərinin “Polideportivo Exido” klubuna keçib. “Mursiya”ya da elə bu klubdan keçib. 2011-ci ildə “Mursiya”nın “B” komandasına keçən həmyerlimiz ötən ildən əsas komandanın üzvüdü. Onun bu klubla müqaviləsi 2015-ci ilədəkdi və deyilənə görə, 15 milyon avro dəyərindədi. “Mursiya”nın əsas komandasındakı debütü 2012-ci ilin noyabrında “Sportinq Xixon”a qarşı olub.
