Milli komandamızın baş məşqçisi Berti Foqtsla ölkəmizin klub məşqçiləri ilə son görüşülərindən birində narazılıq yaranıb.
Korner.az-ın məlumatına görə, ilin sonunda AFFA ilə müqaviləsi bitəcək olan Foqts, millimizin uğursuzluqlarının səbəbini klublarda görür. O, klublarımızın qitə miqyaslı yarışlarda çox uğursuz çıxış etdiyini və yalnız mübarizəni “Qarabağ”ın davam etdirdiyini deyərək, Ağdam təmsilçisinin də bu yarışda çox da qabağa gedə bilməyəcəyini düşünür. Təcrübəli mütəxəssis qeyd edib ki,klublarımız uğursuz çıxış etdiyi halda millidən heçnə gözləmək olmaz.
Foqts Azərbaycanın klub məşqçiləri ilə münasibətlərinin pis olduğunu etiraf edib. Onun sözlərinə görə, həmin məşqçilər ilə son görüşü zamanı onlar iradlarını bildirdilər: “Məni alman rəhmsizliyi ilə çalışmaqda ittiham etdilər. Bu səbəbdən yığıncağı tərk etdim”.
Alman mütəxəssis onu da qeyd edib ki, “Portuqaliyaya 0:3 hesabı ilə uduzduğu oyuna görə kimsədən üzr istəməməlidir. Əgər milli zəif oynayırsa, bunun səbəbi klublardakı zəif məşqdir. Gündə bir saat məşq etməklə, heç nəyə nail olmaq mümkün deyil”.