"Qəbələ kuboku çox əla təşkil olunmuşdu. Məmnuniyyətlə yenidən buraya gəlmək istərdik. Gələcəkdə klubumuzun təşkil edəcəyi turnirlərdə də "Qəbələ"ni görmək xoş olardı".
Korner.az-ın məlumatına görə, bu sözləri Üçüncü Qəbələ kubokunun gümüş mükafatını qazanan "Fənərbağça" klubunun çalışdırıcısı Engin Kabaş deyib.
"Sarı-lacivərdlilər"in çalışdırıcısı Qəbələdə, Şəkidə gördüklərinə heyranlığını dilə gətirib. Kabaş "Fənərbağça"dakı azərbaycanlı futbolçu Amin Seyidovla bağlı fikirlərini də bildirib: "Yaxşı futbolçu olmasına çalışırıq. Ancaq bu uşaqlar elə yaşdadılar ki, indidən necə futbolçu olacaqlarını demək olmur. Ola bilər ki, indi yaxşı futbolçu hesab etdiyimiz yeniyetmə iki ildən sonra etimadı doğrultmasın. Ona görə də səbirli olmaq lazımdır".
