Divizionla əvəzedicilərin çempionatı birləşdirildi
24.07.2018 , 11:46
Futbol üzrə Azərbaycan birinci divizionu ilə əvəzedicilərin çempionatı birləşdirilib.
Bu barədə AFFA İcraiyyə Komitəsinin iclasından sonra qurumun baş katibi Elxan Məmmədov jurnalistlərə açıqlamasında məlumat verib. O bildirib ki, iclasda 2018/2019 mövsümündə iki yarışın birgə təşkilinə dair qərar qəbul olunub.
“İki ay öncə də birinci divizion məsələsi müzakirə olunmuşdu. Həmin vaxt Klublar Komitəsinin adından yeni konsepsiya təklif etmişdik. Lakin bildirildi ki, məsələ daha detallı araşdırılsın. Nəticədə Klublar Komitəsi, Məşqçilər Komitəsi, Peşəkar Futbol Liqası və klublarla müzakirə aparıldı. Yeni konsepsiya hazırlandı. İclasda əvəzedici komandaların birinci divizionda çıxışına qərar verildi. Beləliklə, diviziondan 4 və ya 6, əvəzedicilərdən isə 8 komanda eyni yarışda iştirak edəcəklər. Birinci divizonda yeni komanda olmayacaq. Yeni komandalar Region Liqada çıxış etməlidir. Həmçinin, divizonda limit tətbiq ediləcək. Limit 4 sərbəst, 6 1998-ci il təvəllüdlü, bir nəfər isə 2001-ci il təvəllüdlü olacaq”.
