“Araz Abdullayev yaralı şəxsi başqa maşınla xəstəxanaya aparıb”
Daxili İşlər Nazirliyi “Neftçi”nin futbolçusu Araz Abdullayevin törətdiyi qəzaya münasibət bildirib.
Korner.az-ın "Qafqazinfo.az"-a istinadən verdiyi məlumata görə, bu barədə Daxili İşlər Nazirliyinin mətbuat xidmətindən məlumat verilib. Məlumatda bildirilir, hadisə ilə bağlı hazırda sənədləşdirmə işləri aparılır: “Bu gün Nobel prospektində qəzanın baş verməsi ilə bağlı Daxili İşlər Nazirliyinə məlumat daxil olub. Hadisə nəticəsində 1 nəfər dünyasını dəyişib, 1 nəfər isə yaralanıb”.
DİN-in mətbuat xidmətindən bildirilib ki, qəzanı törədən “Neftçi”nin futbolçusu Araz Abdullayev yaralı şəxsi başqa maşınla xəstəxanaya aparıb.
Hazırda qəza ilə bağlı daha dəqiq araşdırma aparılır.
Qeyd edək ki, Araz Abdullayev “Nissan” markalı avtomobillə qəzaya düşüb.
***
Bakıda futbolçunun törətdiyi qəzada ölən və xəsarət alan şəxslərin adı məlum olub. Xətai Rayon Polis İdarəsindən APA-ya verilən məlumata görə, ölən qadın Zəminə Hüseynovadır.
Qəza nəticəsində daha bir nəfər – 1968-ci il təvəllüdlü Gülsabah Nuriyeva ağır vəziyyətdə Klinik Tibbi Mərkəzə yerləşdirilib. Həkimlər onun vəziyyətini ağır qiymətləndirirlər.
Qeyd edək ki, “Neftçi” klubunun futbolçusu Araz Abdullayev idarə etdiyi avtomobillə Nobel prospektində 2 süpürgəçini vurub.
