Devid Hill: “Bizi çətin oyun gözləyir”
28.08.2019 , 19:21
İrlandiyanın “Linfild” klubunun baş məşqçisi Devid Hili Avropa Liqasının pley-off mərhələsində sabah Bakıda “Qarabağ”a qarşı keçirəcəkləri cavab matçından öncə mətbuat konfransında jurnalistlərin suallarını cavablandırıb.
– Bizi çətin oyun gözləyir. Fikrimcə, ilk görüşdə hesab 3:1 olsaydı belə, rəqib favorit olacaqdı. Sabah ən yaxşı oyunumuzu göstərməyə çalışacağıq. Nələrin baş verəcəyini birlikdə görəcəyik.
– Bakı barədə təəssüratlarınız necədi?
– Bakı çox gözəl şəhərdi. Bu gün qaldığımız otelin yanında gəzmək imkanımız oldu. Bakı haqda ancaq müsbət təəssüratlar var.
– Bura gələn komandalar bir qayda olaraq müdafiə futbolu sərgiləyir. Siz də bu ənənəni davam etdirəcəksiniz?
– Rəqib çox güclü komandadı. Evdə müsbət statistikaları var, az uduzublar. Güclü rəqibə qarşı müdafiə olunmalı olacağıq. İnanıram ki, nəticədən və oyundan razı qalacam.
– 1 milyon funt-sterlinqiniz olsaydı, neçə faizini “Linfild”in mərhələ adlamasına yatırardınız?
– UEFA qaydalarına əsasən, biz mərcə pul yatıra bilmərik. Sözsüz ki, “Qarabağ” favoritdi. Bu qədər pulum olsaydı, “Qarabağ”ın oyunçularından almaq istəyərdim. Məsələn, Riçard Almeyda, Xayme Romero və Rahil Məmmədovu istəyərdim.
– Mərhələ keçə bilməsəniz, təyyarədə gözünüzə yuxu gedəcək?
– Adətən səfərdən evə qayıdanda baş məşqçilər çox şeyi düşünürlər. Səyahətimiz uzun olacaq. Mərhələ keçə bilsək, bu səyahət daha yaxşı yadda qalacaq.
