"Mənə əvvəlcə "Beşiktaş"ın keçmiş prezidenti zəng vurdu. Dedi ki, Mübariz bəy sizinlə görüşmək istəyir, razısınızmı? Dərhal razılıq verdim".
Korner.az-ın məlumatına görə, bu sözləri "Xəzər Lənkəran"ın yeni baş məşqçisi Con Benjamin Toşak deyib.
Bu dəqiqələrdə ictimaiyətə təqdim olunan Toşak onun üçün keçirilən mətbuat konfransında bir çox sualları cavablandırıb:
"Mən bu görüşə razılıq verən kimi İstanbula gəldim, danışıqlar apardım. Bura Uels millisi ilə iki dəfə gəlmişəm və futbolunuzla bağlı təsəvvürüm var idi".
– Uğursuzluqdan qorxmursunuzmu? Bundan öncə bir neçə məşqçi burada özünü doğrultmadı.
Futboldu bu, hər şey ola bilər.
– Özünüzlə köməkçi gətirmisinizmi? Yoxsa "Xəzər Lənkəran"ın köhnə məşqçilər korpusu qalacaq…
35 ildə 7 ölkədə çalşmışam. Həmişə köməkçilərim yerli məşqçilər olub. Yəqin ki, bu dəfə də belə olacaq.
– "Xəzər Lənkəran" tez-tez baş məşqçi dəyişir. Səbəbi ilə maraqlanmısız?
Bu mənə ünvanlanacaq sual deyil. Məşqçi dəyişikliyi futbolda qaçulmaz, adi haldı. "Real" vaxt var idi 5 il ard-arda çempion olmuşdu və "Barselona" bu illərdə 5 baş məşqçi dəyişmişdi. Ancaq Qvardiola gəldi və ardıcıl dəyişikliklər etdi. “Real” kimi komanda da son 12 ildə 14 məşqçi dəyişib. Yəni belə hallar Avropanın güclü klublarında da baş verir.
– Makedoniya millisindən ayrılmağınızın səbəbi kimi o ölkədə yaşamaq istəmədiyiniz göstərilir. Bu məqam Lənkəranlı azarkeşlərdə sual yaradıb: Toşak və komanda Lənkəranda yaşayacaqmı?
Makedoniya millisinə gələndə razılaşmışdıq ki, orada yaşamayacam, Çünki milli üzvləri xaricdə oynayırdılar. Amma sonra federasiya başçısı dəyişdi və yeni gələn bu şərti qəbul etmədi. Amma "Xəzər Lənkəran" başqadı. Lənkəranı, azarkeşlərimizi görməyə səbirsizlənirəm.
– "Xəzər Lənkəran"dan öncə sizinlə "Bursaspor" da maraqlanırdı. Niyə məhz "Xəzər Lənkəran"a "hə" dediz?
"Bursaspor" söhbəti bir ay əvvəl idi və mənə rəsmi təklif gəlməmişdi. Ancaq vasitəçilərlə xəbər göndərmişdilər.
– "Xəzər Lənkəran"a Qafqazın "Çelsi"si deyirlər. Yeni klubunuzun oyun üslubu necə olacaq?
Hər komandanın özünəməxsus oyun üslubu var. Misal üçün, "Real" və "Barselona" eyni ölkə klubları olsalar da, oyun üslubları ayrıdı.
– Millimizin baş məşqçisi Berti Foqts ötən il klub məşqçilərini Dubaya, görüşə çağırmışdı. Yenə belə etsə, gedəcəksiz?
Maraqlıdı. Bəlkə özümlə çimərlik paltarlarını da götürüb orada çimərəm (gülür).
– Gələn il "Xəzər Lənkəran"ın 10 illiyidi. Azarkeşlərə nə kimi söz verirsiz?
Mən işlədiyim ölkələrdə əsasən kubok qazanmışam. Kolleksiyama Azərbaycan kubokunu da qatmaq pis olmazdı.
– Legioner siyasətiniz necə olacaq?
Mənə elə gəlir ki, indi "Xəzər Lənkəran"da legionerlərin sayı çoxdu. Amma gərək onları iş başında görüm. Mənim əsas işim yerli, perspektivli gənclərlə olub. Əgər mağazada dadlı meyvə varsa, supermarketdən süni meyvə niyə alaq ki?
