“Neftçi” klubunun düşərgəsini tərk edərək, “Dinamo -2” klubuna baxışa yollanan Azərbaycan milli komandasının üzvü Cavid İmamverdiyev Ukrayna mətbuatına ilk müsahibəsini verib. “Dynamomania.com” Aleksandr Zozulenin suallarını cavablayan Cavid əvvəlcə özü barədə danışıb.
– Öncə özünüzdən danışardınız…
– Adım Cavid İmamverdiyevdi. 1990-cı il yanvarın 8-də Şəmkirdə anadan olmuşam. Atam da gəncliyində futbol oynayıb. Mən futbol məktəbini bitirməmişəm. “Neftçi”yə də küçə futbolundan gəlmişəm. Bir ara komandadan getdim, amma sonra yenidən bura qayıtdım. Bir il sonra məni əsas komandaya dəvət etdilər.
– Klubunda hansı mövqedə çıxış edirdin?
– Daha çox hücumçuların arxasında oynayıram. Bu, mənim sevimli mövqeyimdi. Orda özümü çox yaxşı hiss edirəm. Sakit oynamağı, topla yaxşı davranmağı sevirəm. Amma kimsə məni izləyəndə işim çətinləşir. Rəqib futbolçunun mənə qarşı fərdi oynamasını xoşlamıram.
– İşlək ayağın hanısıdı?
– Həm sağ, həm də sol ayağımla oynaya bilirəm. Amma daha çox sağ ayağımla oynamağa üstünlük verirəm.
– Standart vəziyyətləri yerinə yetirirsən?
– Hərdən. “Neftçi”də belə zərbələri daha yaxşı yerinə yetirən futbolçular var. Mən isə daha çox künc zərbələrini yerinə yetirirdim. Penalti də vurmuşam.
– Necə oldu ki, “Dinamo”ya gəldiniz?
– Bu haqda menecerim mənə danışdı. “Neftçi”dəki komanda yoldaşım İqor Mitreski də bildirdi ki, Azərbaycan getmək vaxtımdı. Menecerim dedi ki, “Dinamo”ya getmək lazımdı. Bildirdi ki, kiyevlilərin prezidenti məni komandasında görmək istəyir. Mən də razılaşdım.
– “Neftçi” ilə müqavilənin müddəti nə vaxta qədərdi?
– Beş illik. Bu yaxınlarda yeni müqavilə imzalamışam.
– Azərbaycan yığmasına çağırılırsan?
– Gənclərdən ibarət komandalarda oynamışam. Dəqiq üç qol vurub, üç qol ötürməsi etmişəm.
– Orda da hücumçuların arxasında çıxış edirdiniz?
– Bəli.
– Bəs əsas yığmada çıxış etmisən?
– Bəli. 10 yoxlama matçına çıxmışam. Amma hələ rəsmi oyunlarda forma geyməmişəm.
– Yığmanın qarşıdakı toplanışına gedəcəksən?
– Hələ mənə heç nə deməyiblər. Desələr, gedəcəm.
– “Neftçi”nin baş məşqçisi Böyükağa Hacıyev deyib ki, AFFA-da sənin yığmaya çağırılmağını istəməyən insanlar var…
– Berti Foqts məni o qədər də sevmir. O, müdafiə futboluna üstünlük verir. Hücum haqda isə o qədər də düşünmür.
– “Neftçi” ilə hansı uğurların olub?
– Bu komanda ilə üç dəfə fərqli medallar qazanmışam. Həmçinin Avropa Liqasında oynamışam.
– “Neftçi”də maaşlar necədi?
– Əsas komandada 15-18 min dollar, əvəzedici komandada isə 5-6 min dollar.
– Kiyevdə soyuq deyil?
– Xeyr. Mənim üçün əsas futboldu.
– “Dinamo”nun azarkeşləri haqda nə deyə bilərsən?
– Mən onların haqqımda dediklərini eşitmişəm. Guya, belə futbolçu onların nəyinə lazımdı. Amma mən sübut edəcəyəm ki, Azərbaycanda da futbol və futbolçular var.
– Harda istirahət etdin?
– İstanbulda. Daha sonra Tiflisə getdim, ordan da Azərbaycana qayıtdım. Hardasa, 15-20 günlük istirahət etdim.
– Fiziki yüklənmədən qorxmursan?
– Xeyr.
– “Dinamo”da kimi tanıyırsan?
– Mileskini. Yaxşı oyunçudu.
