Ölkəmizi Çempionlar Liqasında təmsil edəcək “Neftçi”nin baş məşqçisi Böyükağa Hacıyev Avstriyadakı təlim-məşq toplanışı çərçivəsində "Volqa" ilə keçirilən oyunu (0:1) şərh edib.
Korner.az-ın məlumatına görə, "ağ-qaralar"ın çalışdırıcısı yoxlama görüşünün o qəddər də önəmli olmamasından danışıb "Təlim-məşq toplanışı çərçivəsində ilk yoxlama oyunumuz idi. Hər iki hissədə fərqli oyunçulara şans verdik. Fasilədən sonra 9 futbolçunu əvəzlədik ki, bu da nəticəyə təsirini göstərdi. Bununla belə, yoxlama oyunlarında nəticə önəm kəsb etmir. Məqsəd futbolçuların hamısına şans verib, onların hazırlıq səviyyəsini yoxlamaq idi".
Hacıyev bildirib ki, qarşılaşmada bütün futbolçular səylə özlərini ən yaxşı tərəfdən göstərməyə çalışıblar: "Bahadır Nəsimovun əsas heyətdə yerini qaytarmaq istəməsi məni sevindirir. Əminəm ki, yeni gələn hücumçular da Nikolas Kanalesin yoxluğunu unutduracaq. İnanıram ki, Çempionlar Liqasının ikinci təsnifat mərhələsindəki ilk oyunumuzadək tam hazır olacağıq".
Xatırladaq ki, “Neftçi” Çempionlar Liqasının ikinci təsnifat mərhələsində Albaniyanın “Skenderbeu” klubu ilə qarşılaşacaq. İlk oyun iyulun 17-də, cavab görüşü ayın 23-də baş tutacaq.
