"Vacib 3 xal qazandıq. Rəqibin Azərbaycanın ən yaxşı komandası olduğunu bilirdik və çox ciddi hazırlaşmışdıq".
Korner.az xəbər verir ki, bu sözləri "Qarabağ" klubunun baş məşqçisi Qurban Qurbanov "Topaz Premyer liqasının 25-ci turu çərçivəsində keçirilən "Neftçi"-"Qarabağ" oyunundan sonra təşkil edilən mətbuat konfransında deyib.
"Azərbaycanın ən güclü komandasıyla oynadıq. Qırmızı vərəqədən sonra vəziyyət dəyişdi. Son dəqiqələrdə futbolçularım boşluq buraxdılar. Amma nəticə ürəyimizcədi. Hələ Opara, Torres ve Reynaldo optimal formada deyillər. Əsas məqsəd rəqibə topla oynamağa imkan vərməmək idi, əks halda, bizə pis olacaqdı. Ola bilər ki, Rəşad Sadiqovun olmaması da rəqibin oyununa təsir etdi".
Böyükağa Hacıyev isə mətbuat konfransında "tufan qoparıb. O, həm AFFA, həm PFL, həm də Hakimlər Komitəsinin "bostanına daş atıb":
"Rəhim Həsənov PFL-in pul dağarcığıdı, cərimələrlə büdcələrini artırır. "Qarabağ"a yox, Rəhimə düşür təbrik. Ən böyük bədbəxtlik odu ki, oyunun hakim-inspektoru Xaqani Məmmədov idi. Hamı deyir, AFFA "Neftçi"yə dəstək verir, hansı dəstəkden söhbət gedir? Bəlkə millinin baş məşqçisinə dediklərimə görə belə edirlər? "İnter" udur bu gün, biz uduzuruq. Bunlar bir ssenarinin tərkib hissəsidi? Ramin Musayev, üzünə gülüb arxanca danışmadım, sənin "Qarabağ"a xüsusi simpatiyan var! Ancaq "Neftçi"ni əzməyə heç kimin gücü çatmaz. Mitreski cəzalı, Flavinyo cəzalı, bu halda bizi atırlar "Simurq"un qabağına. Nədi günahımız?
Bazar ertəsindən mətbuata bunların bütün əməllərini açıb danışacam. Yeni Böyükağa Hacıyevin yetişməsi üçün minimum 30 il lazımdı. Bundan sonra nə AFFA, nə də PFL məni axtarsın, mən də onları axtarmayacam. Mahir Şükürov millidən qayıdandan bəri özünə gələ bilmir. Bəlkə də Foqtsu məndən çox istəyir, bütün gücünü orda qoyub gəlir kluba".
