“Barselona”nın futbolçusu hesabı ödəmək istəmədi
12.09.2018 , 11:16
İspaniya “Barselona”sının futbolçusu Munir Əl-Həddadi ad gününü qeyd etdiyi elit gecə klubunda hesabı ödəmək istəməyib
23 yaşlı hücumçu tədbirinə 30-dək qonaq çağırıb. Onlar çoxlu sayda yemək, içki və qəlyan sifariş ediblər. Hesab isə 16 min avro olub. Əl-Həddadi qəbzdəki rəqəmi gördükdə məbləğin xeyli çox olduğunu deyərək, ödənişdən imtina edib.
Bundan sonra klubun əməkdaşları polis çağırıblar. Onlar iddia ediblər ki, qonaqların sayı deyiləndən çox olub və bu da hesaba təsir edib. Yekunda məbləğ min avro aşağı salınıb və futbolçu pulu ödəyib.
Qeyd edək ki, Munir Əl-Həddadi 2011-ci ildən “Barselona”ya məxsus olsa da, əsas komandada bundan 3 il sonra debüt edib. Lakin heyətdə möhkəmlənə bilməməsi səbəbindən o, iki dəfə icarəyə verilib. İspaniyanın əsas millisində bir dəfə çıxış etdiyindən, FİFA Rusiyada keçirilmiş dünya çempionatında Əl-Həddadinin Mərakeş yığmasında yer almasına icazə verməyib.
