"Düzünü desəm, mənim üçün çətindir, çünki bir aydir ki komandadan kənar qalmışdım. Artıq məşqlərə başlamışam. Əlimdən gələni edirəm ki, tezlikə forma yığım. Zənnimcə, belə davam eləsəm, "Turan"la oyunda komandama kömək edə bilərəm".
Korner.az-ın məlumatına görə, bu sözləri "Bakı"nın müdafiəçisi Əziz Quliyev deyib. 25 yaşlı futbolçu klubun rəsmi saytına açıqlamasında qarşıdakı turlarda keçirəcəkləri oyunlar barədə danışıb:
"Turan"la oyundan sonra bizi Lənkəranda çətin oyun gözləyir. Deyirlər ki, oyun Yevlaxda keçiriləcək. Mənim üçün daha rahat olmalıdı, çünki uzun müddət "Karvan"ın heyətində oynamışam və həmin meydanı yaxşi tanıyıram".
Daha sonra gənc futbolçu millimizin İsraillə oyununa da, toxunub: "Əlbəttə ki, mən Azərbaycan millisinə azarkeşlik edəcəm. Bunun üçün ikiqat stimul var. Çünki milli komandanın heyətinə həmklublarım Elvin və Aqil Məmmədovlar da çağırılıb. Yenidənqurmadan sonra böyük həvəslə Tofiq Bəhramov adına stadiona gedib, oyunu canlı izləyəcəyəm".
![](https://korner.az/wp-content/uploads/2018/06/korner-logo.png)