Qış fasiləsindən sonra bir araya gələn "Bakı" bu gün klubun təlim-məşq bazasında ilk məşqinə çıxıb.
Korner.az-ın klubun rəsmi saytına istinadən verdiyi məlumata görə, baş məşqçi Bojidar Bandoviçin rəhbərliyi altında meydana çıxan futbolçular qızınma hərəkətlərinin ardınca yüngül təmrinlər yerinə yetiriblər.
İlin ilk məşqi yüksək əhval-ruhiyyə ilə müşayət olunub. Viza məsələsində problem yaşayan və bu səbəbdən toplanış gününə qədər ölkəmizə gələ bilməyən Edemir Rodrigez və son çempionat oyununda zədələnərək xəstəxanaya düşən Edin Nuredineski məşqə qatılmayanlar arasında idilər. Makedoniyalı qapıçının düşərgəyə 2 gün sonra gələcəyi gözlənilir.
Məruz qaldığı cərrahiyyə əməliyyatından sonra bərpa dövrü keçən Uinston Parks komandaya fevralın əvvəllərində qoşulacaq. Komandanın heyətinə cəlb olunan Aqil Nəbiyev bugünkü məşqə "Bakı" forması ilə çıxıb.
Beş gün ərzində məşqlərini təlim-məşq bazasında davam etdirəcək komanda bunun ardından qış təlim-məşq toplanışının məkanı Türkiyəyə yollanacaq. Komanda yanvarın 14-də Antalyaya yola düşəcək.
