.jpg)
"Rəvan” futbol klubu Topaz Premyer Liqasının 24-cü turu çərçivəsində "Turan”ı darmadağın etdi.
Korner.az klubun rəsmi saytına istinadən xəbər verir ki, "Dalğa Arena”da keçirilən oyunda ilk hissədən sonra hesabda 1:2 geri olsa da, fasilədən sonra fantastic çıxış edib rəqibə divan tutdu.
11 dəqiqəyə rekord
Bu qələbəmizdə Xuan Manuel Vareanın da müstəsna rolu oldu. Argentinalı qoleador 61-72-ci dəqiqələr arasında 3 dəfə fərqlənməklə komandamızın hesabda önə keçməsinə və üstünlüyünü artırmasına birbaşa səbəbkar oldu. Varea het-triki cəmi 11 dəqiqəyə reallaşdırmaqla Azərbaycan çempionatları tarixində rekorda imza atmış oldu. Hələ heç kim (ilk) 3 qolu(nu) belə tez müddətə vura bilməmişdi.
"Rəvan”da ilk…
Cari mövsümün ikinci het-trikinin müəllifi olan Xuan həm də "Rəvan”ın tarixinə düşmüş oldu. Belə ki, qollarının sayını 11-ə çatdırmaqla bu göstəricidə 2 rəqəmli nəticəyə çatan ilk "aslan” olan Varea həm də komandamızın elitada 1 oyuna 3 qol vurmuş ilk futbolçusu kimi adını tarixə yazdırdı. Milli çempionatlarımız tarixində het-trik edən 23-cü futbolçu olan Varea legionerlərin 30-cu het-trikinin də müəllifi oldu. Ən əsası isə o, çempionatımızda 1 oyuna 3 qol vurmağı bacarmış ilk argentinalı futbolçu kimi də adını tarixə yazdırdı. Xüsusi olaraq qeyd edək ki, "Rəvan”ın əsas bombardiri bütün çempionat oyunlarını əvəzlənmədən keçirib və o, bu baxımdan da hamıdan seçilir.
…cari mövsüm ikinci het-trik
Qeyd edək ki, bu cari mövsüm qeydə alınan ikinci het-trikdir. Daha öncə dekabrın 3-də 15-ci tur çərçivəsində keçirilən "Turan” – "Kəpəz” oyununda (5:1) Tovuz təmsilçisinin malili hücumçusu Salif Ballo 3 qol vurmuşdu. O da maraqlıdır ki, çempionatın geridə qalan bölümündə artıq 3 poker reallaşıb: Nildo (Azal), Nikolas Kanales (Neftçi) və Pərdis Fərcad Azad (Sumqayıt) rəqib qapısına 1 oyunda 4 dəfə yol tapıb.
"Qollarımı qızıma həsr edirəm”
Adını klub və Azərbaycan futbolu tarixinə yazdırandan sonra argentinalı ilə danışmaq zəruri idi. Varea klubun rəsmi saytına açıqlamasında son matç və orda qeydə alınan rekordlar və ilklərlə bağlı bunları söylədi: "İlk öncə onu qeyd edim ki, oyun bizim üçün göründüyü qədər asan keçmədi. Xüsusən ilk yarıda rəqib sona qədər döyüşür, mübarizə aparırdı. Müdafiədəki boşluqlarımızdan yararlanaraq hava toplarında bizə problem yaşadırdılar. Fasilədə baş məşqçimiz bizimlə ciddi söhbət etdi. Onu hələ bu qədər əsəbi görməmişdim. Futbolçular öz arasında söz verdi ki, ikinci hissəni çıxıb fərqli oynayacağıq. Gördüyünüz kimi, fasilədən sonra çox yaxşı oynadıq. 5 qol vurduq, üstəlik, 3 yüzfaizli imkanı da qaçırdıq. Qollarımı qızıma həsr edirəm. Rekord etməyimi ilk dəfə eşidirəm. Belədisə çox xoşbəxtəm, adımı klub və Azərbaycan futbolu tarizinə yazdırdığıma görə. İllər sonra məni xatırlamağa əsas olacaq. Ancaq komandanın uğurunun daha vacib olduğunu da deməliyəm. Qolu kimin vurması elə də önəmli deyil. Əsası 3 xalı qazanmaqdır. İndi mən hücumçuyam deyə daha çox şans əldə edirəm. Belə epizodlardan effektiv yararlanmaq zəruridir. Bombardirlik? Yenə deyirəm, mənə komandamın uğuru daha vacibdir. Bombardir olsam da, lap yaxşı. Həm öz, həm də komandamın adına müsbət hal olardı”.
