İyunun 20-də start götürəcək sorğu avqustun 29-da başa çatacaq
UEFA və ESM (European Sport Media – Avropa İdman Mediası) müştərək olaraq 3-cü dəfə Avropanın ən yaxşı futbolçusunu seçəcəklər. Qalibin mükafatlandırılması avqustun 29-da Çempionlar Liqası qrup mərhələsinin püşkatması zamanı baş tutacaq. Bu dəfə də Monakoda. Ənənəyə uyğun olaraq.
Sözügedən mükafatın münsiflər heyəti UEFA-nın üzvü olan ölkələrin 53 tanınmış jurnalistindən ibarətdir ki, onlardan biri də mənəm. Artıq 3-cü dəfə Avropanın ən yaxşı futbolçusunu müəyyənləşdirmək üçün keçirilən sorğuda Azərbaycanı təmsil edirəm.
Qeyd edim ki, əvvəlki iki illə müqayisədə bu dəfə təşkilatçılar qaydalarda bir sıra yeniliklər tətbiq ediblər. Məsələn, sorğu indi iki mərhələdən ibarət olmayacaq.
Sorğunun ilk mərhələsi iyunun 20-də start götürəcək və iyulun 3-ə kimi davam edəcək. Biz münsiflər ən yaxşı saydığımız 5 oyunçuya səs verəcəyik. Xalların hesablanması qaydası sadədir: anketlərdə 1-ci yerdə yazılan 5, 2-ci yerdəki 4, 3-cü yerdəki 3, 4-cü yerdəki 2, 5-ci yerdəki isə 1 xal alacaq. Bitərəf qalmaq, yəni anketin hansısa pilləsini boş saxlamaq isə qəbul olunmur.
Bu qayda isə dəyişməzdir: Avropa klublarından birində oynayan, hansı qitəni təmsil etməsindən asılı olmayaraq, istənilən futbolçu sorğuda səs ala bilər.
Təşkilatçıların tövsiyəsinə əsasən, münsiflər səsvermə zamanı futbolçuların 2012-ci il sentyabrın 1-dən 2013-cü il avqustun sonuna kimi bütün rəsmi turnirlərdə – klub (həm milli çempionatlarda, həm də Çempionlar Liqası və Avropa Liqasında) və milli komandaların yarışlarındakı (müvafiq hallarda, Avropa və dünya çempionatlarında) performans və uğurlarını nəzərə almalıdırlar.
Beləcə, ilk mərhələnin yekununda ən çox xal toplamış 10 futbolçu ikinci mərhələyə vəsiqə qazanacaq. Bu, sorğunun formatında yenilikdir. Özü də əgər bir neçə oyunçu eyni miqdarda xal alsa, növbəti mərhələyə 10-dan artıq futbolçunun adlamasına da icazə veriləcək.
Səsvermənin ikinci mərhələsi isə iyulun 24-də start götürəcək və avqustun 2-ə kimi davam edəcək. Bu vaxt biz münsiflər 10 nəfərlik siyahıdan ən yaxşı saydığımız üç oyunçuya səs verəcəyik. Anketlərdə 1-ci yerdə göstərilən 5, 2-ci yerdəki 3, 3-cü yerdəki isə 1 xal alacaq. Burada da bitərəf qalmaq, yəni anketin hansısa pilləsini boş saxlamaq isə qəbul olunmur.
Qaydalara əsasən, münsiflər həm 1-ci, həm də 2-ci mərhələlərdə səslərini gizli saxlamalıdırlar. Sorğuya qatılanlar arasında razılaşma da qəti yolverilməzdir. Təşkilatçılar xəbərdarlıq edirlər: bu qaydaları pozanlar səsvermədən çıxarıla bilər.
İkinci mərhələnin yekununda ən çox xal toplayan 3 futbolçu isə final mərhələsinə vəsiqə qazanacaq. Yeri gəlmişkən, əgər bir neçə oyunçu eyni miqdarda xal əldə etsə, həlledici mübarizəyə 3-dən artıq futbolçunun çıxması da mümkündür.
Münsiflər, ənənəyə uyğun, UEFA tərəfindən Monakoya sorğunun final mərhələsinə və mükafatlandırma mərasiminə dəvət olunacaqlar. Burada isə qalib əvvəlki illərdəki kimi, canlı olaraq elektron səsvermə yolu ilə seçiləcək.
Monakoda qaliblə video-konfransın, avqustun 30-da isə UEFA prezidenti Mişel Platininin brifinqinin keçirilməsi də nəzərdə tutulub. Bunların da ilk dəfə həyata keçiriləcəyini qeyd edim.
Rasim Mövsümov
UEFA Best Player in Europe və FIFA Ballon d’Or mükafatlarının münsif üzvü
