“Fənərbağça” ilə yollarını ayıran Aleks, "alex10.com.br" adlı fərdi internet saytında müqaviləsinin ləğv olunmasının səbəblərini açıqlayıb.
Korner.az– ın məlumatına görə, Aleks Əziz Yıldırım və Aykut Kocamanla nələr danışdığına aydınlıq gətirib. "Sambaçı"nın yazdığı mətni diqqətinizə çatdırırıq.
“Fənərbağça”dan ayrılmağımla əlaqədar olaraq baş verən hadisələri açıqlığa qovuşdurmaq ehtiyacı hiss etdim.
Şənbə günü "Kasımpaşa"ya 0:2 hesabıyla məğlub olduq. Oyundan sonra baş məşqçimiz paltardəyişmə otağına gəldi və istefa verdiyini dedi. Sonra bir idarəçi bir şeylər söylədi, ardınca başqan gəldi, o da bir şeylər söylədi. Ən sonda futbolçular danışdılar. Məsələnin ən kədərli tərəfi isə o danışılanların heç biri futbolla əlaqəli olmamasıydı.
Bazar günü normal məşqə qatıldım. Bazar ertəsi isə bazaya getdikdə baş məşqçi məni heyətdən kənarlaşdırdığını söylədi. Ona dedim ki, bunu yalnız ciddi intizamsızlığa yol vermiş olsam edə bilərdi. Halbuki intizamsızlıq etməmişdim, Buna görə də əsl səbəbi öyrənmək istədim.
Baş məşqçi bunun qarşılığında: "Mən baş məşqçiyəm və komandanın liderliyi məndədi. Amma sən çox böyüksən və qüvvətlisən. Səni planlarımın içərisinə ala bilmərəm, buna görə də belə bir qərar verdim" – dedi.
Mənim cavabım çox sadə oldu: "Yaxşı. Bəzi qərarları vermək üçün prezidentlə görüşəcəyəm, görək o nə deyir bu vəziyyətə".
Prezidentin otağına saat 16:15-də girdim və 16:18-də çıxdım. 8 illik klub tarixindəki varlığıma 3 dəqiqədə qərar verdi.
Prezident: "Bəli, danışaq" – dedi. Mən də baş məşqçinin heyətdən kənarlaşdırılmağımla əlaqədar qərarını necə qiymətləndirdiyini soruşdum. "Qərar sənindi! İstəsən komandadan ayrı çalışarsan, istəsən gedərsən" şəklində cavab verdi. Beləcə bitdi.
Bazar ertəsi günü bir mətbuat konfransı keçirib “Fənər” azarkeşlərinə hər şeyi olduğu kimi danışacam. Braziliyaya gedə bilmək üçün bunları açıq şəkildə danışmaq məcburiyyətindəyəm".
