Cümə axşamı Avroliqanın qrup mərhələsi çərçivəsində baş tutan “Qarabağ” – “İnter” oyunu (0:0) barədə müzakirələr hələ də səngimək bilmir. Hisslər, emosiyalar bir-birinə qarışıb. Bəs görəsən bizim yerli məşqçilərin, hansı ki, Məşqçilər Komitəsinin üzvləridirlər bu matça və ümumilikdə avrokuboklarda “Qarabağ”ın bumövsümkü çıxışına münasibəti necədir?
Böyükağa Hacıyev: “Qarabağ”ın haqqı yeyildi. Mən deyərdim ki, “Qarabağ” bu mövsüm yaxşı çıxış etdi. Yığılan 6 xal da bunun göstəricisidir. “Qarabağ” qrup mərhələsinə qədər keçirdiyi görüşlərdə də baxımlı futbol sərgilədi. “Qarabağ”ın təkcə Bakıda “Dnepr”ə uduzmağı ona imkan vermədi ki, qrupdan çıxsın. Yenə deyirəm, axırıncı oyundakı kobud hakim səhvləri “Qarabağ”a qarşı böyük haqsızlıq oldu. Ümumi çıxış barədə isə onu deyim ki, son vaxtlar klubun oyununda eniş hiss olunur. Yəni, “Qarabağ”, elə bil, əvvəlki kimi oynamır. Bu da heyətdəki itkilərdən irəli gəlir. “Qarabağ”ın əsas qol silahlarından Reynaldonun yoxluğu öz təsirini göstərdi. Hansı “İnter” daha güclü idi? Yox, mən bunu birbaşa deyirəm, iki il əvvəl milanlılar indikindən güclü idi. Çünki o klubun heyətində Kassano, Koutinyo, Kambiasso, Pereyra kimi futbolçular var idi. İndi o heyətdən heç kim qalmayıb”.
Vaqif Sadıqov: “Hesab edirəm, hamı eyni fikirdədir ki, “Qarabağ”ın haqqı yeyildi. Avroliqanın 1/16 final mərhələsinə bir addım, bir neçə saniyə qalmışdı. Onlar tarix yazmışdı, ancaq heyf ki, kluba qarşı belə bir addım atıldı. Bütün bunlara baxmayaraq, “Qarabağ”ımıza təşəkkürlər düşür. Ona görə ki, hər oyunda bizə sözün əsl mənasında böyük sevinc bəxş ediblər. Ona görə ki, biz Avropada “Qarabağ” sədalarını eşitdik. “Qarabağ”ın bizim qürurumuz olduğunu hər bir oyunda xüsusən də güclü “İnter” qarşısında şahidi olduq. Həyat davam edir və mən inanıram ki, bundan böyük uğurlar hələ “Qarabağ”ın qarşısındadır. “Qarabağ” öz missiyasını artıqlamasayıla yerinə yetirdi, hansısa çatışmazlıqdan söhbət belə gedə bilməz. Və “Qarabağ” sübut etdi ki, bizim futbolçular 90 dəqiqə yox, lap 95 dəqiqə də oynamağa hazırdır. Bizim sona qədər mübarizə aparmağa qadir olan futbolumuz, komandamız var. Avropa standartlarına cavab verən komanda gördük Avroliqanın qrup mərhələsində. Təəssüflə deyirəm ki, biz bu şoku indi də öz üzərimizdən ata bilməmişik. Əlimizdən gələn hər şeyi etməliyik ki, bu məsələdə bizim lehimizə qərar qəbul edilsin”.
Şahin Diniyev: “Doğrudan da, ağırdır belə bir oyundan sonra danışmaq. Axırıncı dəqiqədə təmiz qol vurmuşduq. Hakim sadəcə “Qarabağ”ın haqqını yedi. “Qarabağ” layiq idi,növbəti mərhələyə çıxmağa. Belə bir şans bu neçə ildə birinci dəfə idi ki, əlimizə düşmüşdü. Komandamızın üzü güləcəkdi, sadəcə, hakimin kobud səhvi buna imkan vermədi. Komandaya səbir arzulayıram. Bu futboldu, futbolda isə hər şey olur. İnşallah, növbəti illərdə bu uğurları təkrarlayarlar. Klubumuz bu mövsüm normaldan da yuxarı çıxış etdi. Bu il çox yaxşı komandamız var idi. Əsas məqsəd qrup mərhələsinə düşmək idi, ondan da qabağa getdik. Qrupdan da çıxmaq şansımız var idi və 6 xal da qəhrəmanlıq sayılmalıdır”.
Ağasəlim Mircavadov: “Qarabağ” Avroliqanı uduzmadan tərk etdi (görünür, Ağasəlim bəy nəticə deyil, mənəvi cəhətdən uduzmamağı nəzərdə tutur – Ü.M.). Son oyunda baş verənlər hakimin boynunda idi. Hakimin çox demirəm, bir balaca vicdanı olsaydı, o qolu verərdi. “Qarabağ”ı hakimlər uduzdurdular. Başqa heç nə. Bütün turniri yaxşı oynadılar. Sevindirdilər bizi. Onları təbrik edirəm”.
Ürfan Məmməd
