AFFA “Simurq”a bu qurum tərəfindən kömək olunacağı haqda yayılan xəbərlərə münasibət bildirib.
Korner.az-ın “Futbolxeber.az”a istinadən verdiyi məlumata görə, məsələ ilə bağlı danışan Asssosiasiyanın İnformasiya və İctimaiyyətlə Əlaqələr Departamentinin rəhbəri Mikayıl Nərimanoğlu bunları deyib:
“Simurq”un prezidenti Anar Bəkirovla Elxan Məmmədov arasında görüş olmayıb. Tərəflər telefonla danışıblar. Elxan Məmmədov komandaya kömək olunacağını bildirib. Amma bunun üçün “Simurq” AFFA-ya müraciət etməlidir. Klub tərəfindən bizə məktub gəlməliydi. Lakin dünən iş gününün sonuna kimi gözləsək də, məktub gəlib çıxmadı. Yəni, “Simurq”dan bizə müraciət daxil olmayıb.
Sual yarana bilər ki, AFFA “Bakı”ya kömək etdi, amma “Simurq”a kömək etmir? Məsələ burasındadır ki, “Bakı” tərəfindən bizə rəsmi müraciət olundu. Klub rəsmiləri, futbolçuları kömək olunmasını istədilər. Biz də klubun bank təminatının aktivləşdirilməsinə yardımçı olduq. Eyni halın təkrarlanması üçün “Simurq” da ilk növbədə rəsmi olaraq AFFA-ya müraciət etməlidir”.
