AFFA daha bir hakimin səhvini aşkarlayıb.
Korner.az-ın məlumatına görə, Ramil Diniyevin futbolçuya göstərdiyi sarı vərəqəni protokolda göstərmədiyi bəlli olub.
AFFA İntizam Komitəsinə daxil olmuş məlumata əsasən Topaz Premyer Liqasının XII turunun “Bakı” – “Simurq” matçının 57-ci dəqiqəsində “Simurq”un futbolçusu Patrik Osiakaya göstərilmiş sarı vərəqə matçın hakiminin səhvi nəticəsində protokolda qeyd edilməyib. Lakin oyunun videoyazısını izlədikdə həqiqətən də həmin dəqiqədə adıçəkilən futbolçunun sarı vərəqə ilə cəzalandığı aşkar olunub. Bu səbəbdən protokolda qeyd edilməyən sarı vərəqə “Simurq”un futbolçusu Patrik Osiakanın aktivinə əlavə edilib. Hakimlər Komitəsinə matçın hakimləri ilə bağlı lazımi ölçü götürüb İntizam Komitəsinə məlumat vermək tapşırılıb.
Qeyd edək ki, AFFA İntizam Komitəsinin ötən iclasında XVI turda Orxan Məmmədovun etdiyi səhvi aşkarlanmışdı. Belə ki, referinin AZAL – “Rəvan” matçınının 90+2-ci dəqiqəsində AZAL-ın futbolçusu Xuan Fransiskoya göstərdiyi sarı vərəqəni Oskar Klavanın adına yazdığı müəyyənləşmişdi.
