Bakıda keçiriləcək Cüdo üzrə “Böyük dəbilqə” turnirinin mətbuat konfransı keçirilib.
Korner.az-ın məlumatına görə, konfransda Beynəlxalq Cüdo Federasiyasının idman direktoru Daniel Laskao, Hakimlər Komitəsinin rəhbəri Börd Axiles, Azərbaycan yığmasının baş məqşçsi Mövlud Mirəliyev və baş katib Elmar Babanlı iştirak edib.
Konfransa dəvət edildiyinə görə təşəkkürünü bildirən Hakimlər komitəsinin rəhbəri Börd Axilles yarışın hazırlığının yüksək səviyyədə olduğunu söyləyib: "Bir neçə il əvvəl də Bakıda olmuşdum və həmin vaxt da yarışlardan çox razı idik. Buradakı hakimlər Rio Olimpiadasında da iştirak edəcəklər. Əbu-Dabi və Bakıda yarışlar həmişə yüksək səviyyədə keçirilir".
Beynəlxalq Cüdo Federasiyasının idman direktoru Daniel Laskao isə Azərbaycan Cüdo Federasiyasının son 15 ildə böyük inkişafa nail olduğunu bildirib: "Böyük dəbilqə" turniri dünyada olan bütün ölkər üçün əhəmiyyətlidir. Bu yarışda bir çox olimpiya medalçıları iştirak edəcək. Azərbaycan üçün bu çox əlverişlidir ki, hər çəkidən 4 nəfər olacaq. Azərbaycan cüdo sahəsində öz inkişafını davam etdirir və artıq həm Avropa, həm də dünya çempionu olub. Biz Azərbaycan Cüdo Federasiyasının bu sahədəki böyük əziyyətini görürük. Ötən illərdən bu günə qədər böyük irəliləyişlər var".
Azərbaycan Cüdo Federasiyasının baş katibi Elmar Babanlı 4 il öncə Azərbaycana etimad göstərib yarışın Bakıda keçirilməsinə razılıq verilməsindən məmnunluq duyduğunu ifadə edib: "Ötən yarışlardakı uğurllara və bu yarışın da xüsusi hazırlığına əsaslanaraq əminlik bildirmək istəyirəm ki, biz etimadı doğrultmuşuq. Növbəti yarışın da Bakıda keçirilməsi üçün müqavilə imzalamağa çalışacağıq. Püşkatmanı azərbaycanlılar üçün uğurlu saymaq olar. 3 gün ərzində izləyicilər maraqlı yarış izləyəcəklər. Azərbaycanda hakimlik imtahanında iki namizəd olmuşdu və hər iki namizəd imtahandan üzüağ çıxıb. Beynəlxalq Cüdo Federasiyasının "B" lisenziyasını kişilərdən Mətin Rəhimli, qadınlardan Arzu Acalova qazanıb. 5 ildən sona BCF "A" lisenziyası üçün imtahan vermək hüququ alacaqlar və bu 5 il ərzində onlar özlərini doğrultmalıdılar".
Milli komandamızın baş məşqçisi Mövlud Mirəliyev komandanın yarışa hazır olduğunu deyib: "Rusiyanın Kazan şəhərində Avropa çempionatında olduq. Komanda olaraq 3-cü olduq ki, bu da ilk dəfə idi. Hər həftə demək olar ki, yarışlar olur. “Böyük dəbilqə”də əsas heyət iştirak edəcək. İki nəfər zədə baxımından iştirak etməyəcək: Elmar Qasımov və Nicat Şıxalizadə. İdmançıların vəziyyəti yaxşıdı. Üstünlük bizdədir, ümid edirəm ki, yaxşı nəticə verəcəyik. Cüdoda proqnoz çətindir. Təxmini 3-4 medal proqnozlaşdırırıq. Güclü yarış keçiriləcək. Hər idmançı reytinq xalı üçün çalışacaq. Ümid edirəm, idmançılarımız mənim təxminimdən daha çox medal qazanar. Favoritlər əsas heyətdir – 60, 73 və 90 kq. Xanımlardan 48 kq-lıq çəki dərəcəsində mübarizə aparacaq Ayşəyə inanırıq.
