“Mən tam səmimi danışacam. Quzanlıda oynamaq məsələsində iki mövqe var: biri mənim, o biri komandanın texniki heyətinin. Mənim mövqeyim belədi ki, niyə azarkeşlərimizin çox olduğu yerə getməyək? Ancaq futbolçularımızın, texniki heyətin də öz marağı var: komanda mövsümü uğurlu nəticəyə başa vursun”.
Bu sözləri “İmarət” fan-klubunun ilin sonuna həsr olunmuş mükafatlandırma tədbirində “Qarabağ” Futbol Klubunun prezidenti Tahir Gözəl Korner.az-ın əməkdaşının: “Bu il ev oyunlarınızı Quzanlıda keçirməkdən imtina etdiz. Ağdamda oyunlarınızı minlərlə insan izləyirdi. Bu gün isə azsaylı fanatlar gəlir Tofiq Bəhramov adına stadiondakı ev oyunlarınıza. Quzanlıda oynamaqdan imtinaya görə peşman deyilsiz?” – sualına cavabında deyib.
Tahir Gözəl qeyd edib ki, Quzanlıdakı oyunlarda azarkeşlərin verdiyi dəstək hər kəsi heyran edirdi: “Bir başqan nə istər? Azarkeşini görmək istər, onların alqışlarını duymaq istər, ləzzət almaq istər. Biri var gəlib stadionda 200 nəfər görəsən, bir də var, 7000 nəfəri. Bu məsələylə bağlı dəfələrlə toplantımız oldu. Texniki heyət üzvləri dedilər ki, Tahir bəy, bizdən nə istəyirsiz? Çempionluqmu? Futbolçular o yolu getməyə, ordakı şəraitdə futbol oynamağa razı deyillər, çox yorulurlar, bunlar işimizə mane ola bilər və biz qorxuruq. Bakıda oynamağımız məsləhətdi. Bu, onların mövqeyidi. Dedim ki, yaxşı, olsun, ancaq ildə bir neçə oyunumuzu Quzanlıda keçirək. Bu dəfə də Peşəkar Futbol Liqasından etiraz eşitdik. Dedilər ki, bir-iki oyunu Quzanlıda keçirə bilməzsiz. Mən də sizinlə razıyam ki, Quzanlıda oynamaq daha xoşdu. Ancaq desəm ki. bütün oyunlarımızı orda keçirək, yenə texniki heyət narazılıq edəcək. Sabah çempionluq məqsədinə nail olunmayanda deyəcəklər ki, Tahir bəy, siz bizim istədiyimizi etmədiz, biz də o məsuliyyətdən azadıq. Mən də bunu etmək istəmirəm. Bəlkə qarşı tərəfdən – Peşəkar Futbol Liqasından xahiş edək ki, bir-iki oyunumuzu orda oynamaq üçün yenidən xahiş edək? İnanın, hamınızdan çox, mən istəyirəm komandamızın Quzanlıda oynamasını. Mənimçün ora möhtəşəm yerdi futbol oynamaq üçün. Amma nə bilim, bəlkə də o meydanda mən oynamadığım üçün belə düşünürəm”.
