.jpeg)
Zaqatalanın "Simurq" klubunun futbolçusu Ruslan Poladovun Korner.az saytına müahibəsi.
– Premyer Liqanın 17-ci turunda “Qəbələ”ni minimal hesabla məğlub etdiniz. Çətin səfərdən qələbə ilə dönəcəyinizə inanırdız?
Biz bütün oyunlara 3 xal üçün çıxırıq. "Qəbələ" ilə oyuna da yüksək motivasiya ilə çıxmışdıq. Bilirdik ki, "Qəbələ" ilk dəqiqələrdən hücuma atılacaq və erkən qol vurmağa çalışacaq. Müdafiədə dəqiq oynayıb onlara bu imkanı vermədik və sonda qələbə topunu vurub qalib gəldik.
– Oyun boyu hücum edən tərəf "Qəbələ" olsa da, sonda qalib gələn "Simurq" oldu. Bu oyunda əsas məsələ uduzmamaq idi?
Biz rəqib meydanında oynayırıq və "Qəbələ"nin yaxşı hücum xətti olduğunu bilirik. Ona görə də müdafiəyə daha çox nəzarət edirdik.
– Matçın sonunda baş hakim Vüsal Əliyev qapıçınız David Petrzkeviçə qırmızı vərəqə göstərdi. Onun baş hakimi təhqir etdiyi üçün bu cəzanı aldığı bildirilir.
Mən qapıçımızı yaxşı tanıyıram. O, sadəcə baş hakimə iradını bildirdi ki, əlavə vaxt bitib, ancaq oyun davam edirdi. David bizim mentalitetimizi bilən, tərbiyəli qapıçıdı. O, vaxta görə bunu etdiyini bildirdi. David bizim dili bilmir. İngilis dilində bir-iki söz ancaq bilir. O, öz dilində (polyak) ancaq danışır.
– "Simurq" artı liderlər qrupunda qərarlaşıb. İli yekunlaşdırmaq üçün cəmi bir qarşılaşma qalıb. Bu tempi yeni ildən etibarən də davam etdirmək mümkün olacaq?
Çalışırıq ki, bu templə davam edək. Əsas məsələ uğurlu çıxışı ardını gətirməkdi. "Rəvan"la oyundan sonra fasiləyə yollanacağıq. Fasilə zamanı yenidən öz üzərimizdə işləyib, daha da güclənməyə çalışacağıq.
– Həm kubok, həm də çempionatda yolunuza davam edirsiz. "İki cəbhə"də vuruşmaq çətin olmayacaq?
Təbii ki, bir az çətinlik ola bilər. Ancaq rəhbərlik qarşımıza şərt qoyub ki, uğurlu çıxışımızı sona kimi göstərək.
– Fasilədən öncə "Rəvan"la qarşılaşacaqsınız. Bu oyunla bağlı nə düşünürsən?
Çətin oyun olacaq. "Rəvan"la da oyuna tüksək motivasiya ilə çıxacağıq. Azərbaycan çempionatında inkişaf öz sözünü deyir. Artıq "hazır yem" yoxdu. "Rəvan"la oyunda hədəf 3 xaldı.
