"Heyətdəki itkiləri nəzərə alsaq, nəticəni məqbul saymaq olar. Zədəlilərimiz çox idi. Nikolay Svejentsev meydana ağrıkəsici iynə ilə çıxmışdı, amma bunun da köməyi olmadı. Nəticədə 3-cü dəqiqədə onu əvəzləmək məcburiyyətində qaldıq".
Korner.az-ın məlumatına görə, bu sözləri "Kəpəz" klubunun baş məşqçisi Mahmud Qurbanov "Bakı" ilə oyundan sonra keçirilən mətbuat konfransında deyib.
M.Qurbanov bu görüşdə qələbə qazanmaq istədiklərini bildirib: "Oyunu əks-hücum üzərində qurmuşduq. Rəqibin hücumlarının qarşısını ala bildik. Ucaboy hücumçuların hava ötürməsi zamanı səylərini nəzərə almasaq, həmlə təşkil etmələrinə imkan vermədik. Qələbə qazanmaq istəyirdik, lakin oyundan bir xalla ayrıldıq. Uşaqların əksəriyyəti təcrübəsizdir, üzərimizdə hələ çox işləməliyik”.
