Avropa Liqasının qrup mərhələsində “Neftçi”nin rəqiblərindən olan Milan “İnter”inin prezidenti Masimo Moratti komandasının skudetto uğrunda mübarizədəki şanslarını dəyərləndirib.
Korner.az-ın məlumatına görə, Moratti “RAİ” telekanalına açıqlamasında “İnter”in çalışdırıcısı Andrea Stramaççoni ilə Joze Maurinyonu da müqayisə edib.
“İnanıram ki, skudettonu qazanacağıq. Mən buna inanmağa borcluyam. Çünki bu inamın sayəsində futbolçularım əllərindən gələni edəcəklər ki, məqsədimizə nail olaq. Stramaççoni ilə Maurinyonu işə can yandırmaq xarakterlərinə görə çəkinmədən müqayisə edə bilərəm. Bu keyfiyyət hər bir peşəkarda olmalıdı. Stramaççoni gələcəkdə Maurinyonun qazandıqlarını qazana biləcək çalışdırıcıdı. “Milan”ın Qvardiolanı baş məşqçi postuna gətirmək istəməsi haqda yalnız bir şey deyə bilərəm: mənim artıq əla məşqçim var!”, – deyə Moratti bildirib.
