“İnter”in yarımmüdafiəçisi Samir Zərgərovun klubun rəsmi saytına müsahibəsi
– 8 tur artıq arxada qalıb. Mövsümün startını qiymətləndirməyi xahiş edirik.
– Deyə bilərəm ki, çempionat çox maraqlı keçir. Cari mövsümdə çox sürprizlər var, bəzi komandaların yaxşı çıxış etməsi əsl sürpriz oldu. Biz mövsümə pis başlamadıq və son 4 qarşılaşmanın 3-də 100 faizlik nəticə əldə etməyi bacardıq. İnşallah, uğurlu seriyanı davam etdirərik. Məqsədimiz çempionluqdu.
– Sürpriz komandalardan bəhs etdin. Deyə bilərsən, çempionatda “İnter”in əsas rəqibləri hansı komandalardı?
– Bilirsiniz,ə gər ötən il çempionatda 7-8 güclü komanda vardısa, indi onların sayı kəskin artıb. Premyer Liqada zəif komanda qalmayıb. Meydana çıxan zaman rəqibdən daha çox qaçmalıyıq, mütləq çalışmalıyıq, əks təqdirdə xal itirə bilərik. Yəni demək istəyirəm ki, qələbə üçün hər oyunda tam gücümüzü ortaya qoymalıyıq.
– Növbəti turda “İnter”i çempionatın hazırkı lideri “Simurq”la matç gözləyir. Qarşıdakı oyun barədə və rəqib komanda haqqında nə deyə bilərsən?
– Etiraf edim ki, bu mövsüm mən “Simurq”un oyununa baxmamışam, lakin turnir cədvəlində 1-ci yerdə olduğunu nəzərə alsaq, belə demək olar ki, rəqib çox yaxşı komandadı. Bu komandanın sükanı arxasında ötən mövsüm birlikdə çalışdığımız Giorgi Çixradze dayanır. O, çox yaxşı insan və məşqçidi. Bir sözlə, bizi çox çətin matç gözləyir.
– Bu mövsüm ötən mövsümlə müqayisədə meydana daha az çıxırsan. Yəqin əsas heyətdəki itirdiyin yeri qaytarmaq istəyirsən?
– Təbii ki, hər bir futbolçu əsas heyətdə oynamaq istəyir. “İnter”də hər futbolçuya şans verilir. Əgər məşqçi əsas heyətdə oynamağı mənə etibar edərsə, o zaman böyük arzuyla mənə göstərilən etimadı doğrultmağa çalışaram.
– Bu mövsümdə komandada rəqabət hissediləcək dərəcədə güclənib. “İnter”ə bir çox yaxşı futbolçu gəlib. Yeni futbolçular haqqında nə deyə bilərsən?
– Siyahını yaxşı futbolçular tamamlayıblar. Onlar çempionluq yolunda komandaya kömək etməlidilər.
– Bu gün DÇ-2014-ün seçmə mərhələsi çərçivəsində Azərbaycan səfərdə Rusiya milli komandasına qarşı oynayacaq. Bu matçla bağlı proqnozlarını bilmək istərdik.
– İstərdim ki, komandamız vətənə müsbət nəticəylə qayıtsın. Bu matç Azərbaycan futbolunun tərəqqisini bir daha təsdiqləyə bilər. Unutmamaq lazımdı ki, bizi hissediləcək dərəcədə üstələyən milli komandayla oynayırıq. Odu ki, bu oyunda hətta məğlubiyyət faciə kimi qiymətləndirilməməlidi.
