AFFA dünyanın gözünü kor qoyub ilin ən yaxşılarını seçib. Bunu bir dəfə “KomandA”ya da demişdim, bu ölkədə ilin ən yaxşı futbolçusu olmaq yalnız həmin oyunçunun transfer qiymətinin artırılması üçündü. Başqa heç nə. İndiyədək ilin futbolçusu olanlardan hansı irəli gedib?
Hələ onu demirəm ki, bu adların kimlərinsə ciblərinə pul basmaqla alınmasına şübhəm var. Əksini düşünən buyurub desin görək, AFFAmania harda sorğu keçirtdi, kimlər iştirak etdilər və bu nəticələr hardan hasil oldu? Bu bir…
İkincisi, hər “şapalaqladıqca” qızarmaq əvəzinə, bir az daha ağaran üzlər, deyin görək, hansı ağıl və məntiqlə qızlar arasından ən yaxşını seçmisiz? İnsan nə qədər şüursuz olmalıdı ki, öz ölkəsində keçirilən çempionatda bir qol da vura bilməyən komandadan kimisə yaxşı oyunçu etsin? Bu qədər əbləhlik olarmı?
Üçüncüsü, əgər bir nəfər (konkretləşdirək: Vitali Borisov) üç il dalbadal ilin ən yaxşısı seçilirsə, bu, həmin sahədə nəslin tükəndiyini göstərir. Utanmaq, ayıbınıza qısılmaq əvəzinə, siz bir az da … Yazmıram. Onsuz da nöqtələrin yerinə nə yazsam, yenə kar etməyəcək.
Dördüncüsü, AFFAmania neçənci dəfədi ki, belə tədbirlərə özlərinin təbirincə desək, müxalif, əslində isə müstəqil düşünən, müstəqil fəaliyyət göstərən mətbu orqanları dəvət etmir. Bunu da yazdıq yaddaşa, “Maykl”. Bumeranq idi. Vaxtı çatanda “şapalaq” olub qayıdacaq üstünə…
