"Neftçi"nin ÇL-ı II təsnifat mərhələsindəki rəqibi "Zestafoni"ni daha yaxşı tanımaq üçün heyətinə nəzər salaq.
Korner.az-ın məlumatına görə, bu klub bizə elə də yad deyil. Daha dəqiq desək "Zestafoni"nin heyətində 4 futbolçu var ki, onlar bizə daha tanışdır.
Belə futbolçulardan biri 2005-2006-cı il mövsümündə "Kəpəz"in heyətində top qovmuş yarımmüdafiəçi Qoqa Beradır. Bir mövsüm Gəncə təmsilçisində çıxış etdikdən sonra Qoqa, Ağdamın "Qarabağ" klubuna transfer olunub. Lakin gürcüstanlı futbolçunun ölkəmizdəki son klubu da bu olmayıb. O, 2009-cu il mövsümündə "Qəbələ"yə keçib və 2 mövsüm orada çıxış edib.
Başqa bir futbolçu isə Tornike Aptsiauridir. Futbolsevərlər də onu "Qəbələ"dən xatırlayırlar. Yarımmüdafiəçi, 2007-2009 mövsümündə Qəbələnin eyni adlı klubunda çıxış edib. Daha sonra hazırda "Neftçi"yə rəqib olan "Zestafoni"yə transfer olunub.
"Qəbələ"nin uğurları üçün tər tökmüş digər gürcüstanlı futbolçu isə Zurab Mamadadzedir. Qapıçı mövqeyində çıxış edən Mamadadze də Aptsiauri kimi "Qəbələ"yə 2007-2008 mövsümündə transfer olunub. Və cəmi 1 mövsüm çıxış etdikdən sonra, komandadan ayrılıb.
Ölkəmizdə oynamış "Zestafoni"də çıxış edən 4 -cü gürcü futbolçu isə Teymuraz Qonqadzedir. 2010-cu ildə Zaqatala "Simurq"una keçən müdafiəçi, elə həmin mövsümün sonunda da Gürcüstanın "Dinamo" (Tiblisi) komandasına transfer olunub.
Maraqlı faktlardan biri isə odur ki, Gürcüstan təmsilçisinin heyətində cəmi 1 legioner futbolçu var ki, o da nigeriyalı Abayomi Ovonikoko Şeundur. "Neftçi" Şeuna qarşı ehtiyatlı olmalıdır. Çünki 22 yaşlı gənc futbolçu hücumçu mövqeyində çıxış edir. Nigeriyalı forvard "Zestafoni"nin əsas qol ümidlərindən sayılır. Ovonikoko ötən mövsüm 15 dəfə rəqib qapılarına yol tapıb.
Hidayət QURBANOV
