Zaur İsmayılov: “Maksimovun gedişi yox, məğlubiyyət komandaya pis təsir edib”

Paytaxt təmsilçisi Avropa Liqasının I təsnifat mərhələsinin cavab oyunları çərçivəsində sabah öz meydanından Maltanın “Baltsan” klubunu qonaq edəcək.

Oyundan bir gün öncə mətbuat konfransı keçirən gənc çalışdırıcı fikirlərini bildirib: “Səfərdə üstünlük bizdə olsa da, səhvlərdən qollar buraxdıq. Müdafiə inamsız çıxış etmişdi. Çalışacağıq ki, istədiyimiz nəticəni əldə edək”.

– Yuri Maksimovun gedişi komandaya pis təsir etdi, yoxsa “Baltsan”a məğlubiyyət?

– 1:4 hesablı məğlubiyyət daha öncə olmuşdu. Məlum hadisələr isə 2 gün öncə baş verdi. Məncə, ən çox məğlubiyyətimiz təsir etdi.

– Məğlubiyyətin əvəzini çıxacağınıza nəyə əsasən inanırsız?

– Rəqib zəif deyil. Baxmayaraq ki, Malta klubudur. Gərək hər oyuna ciddi yanaşasan. Onların üstün tərəfi əks-hücumlar idi. Üstün cəhətlərində yararlana bildilər. Səhvlərimizdən qollar buraxdıq. Bizim də şanslarımız olmuşdu. Ona görə ümid edirəm ki, sabah əlimizə düşən şanslardan istifadə edib qalib gələcəyik.

– Sabah sizin üçün ciddi sınaqdır. Hansı məqamlara ciddi yanaşacaqsız?

– Zəif cəhətlərini maksimum şəkildə analiz etmişik. Onlar müdafiə olunacaq. Bu da çətin olacaq. Müdafiə olunan komandaya qarşı oynamaq çətindir.

– Əsas heyətdə dəyişikliklər olacaqmı?

– Heyətdə 2 dəyişiklik olacaq. Bahodir Nasimov ola bilsin ki, start heyətdə yer alsın. Hücumameyilli oynayacağıq. Andre Klennon, Amil Yunanov və Bahodir Nasimov üçlüyü start heyətdə ola bilər.

– Yuri Maksimovun oyun sistemi ilə oynaycaqsız?

– İndi demək istəməzdim. Məcburuq ki, ilk dəqiqələrdən hücum edək. İlk oyunda “Baltsan” müdafiədə oturub, əks-hücunmlarda oynadı.

– Pərdis Fərcad-Azadın “Keşlə”yə qayıtması gözlənilir?

– Transferlərimiz başa çatıb. Baş məşqçimiz də açıqlamasını vermişdi. Hazırda bu məsələ gündəmdə deyil.

– Zaur Axundov komanda ilə görüşüb?

– Oyundan sonra da bizimlə görüşmüşdü. Bizə dedi ki, başınızı qaldırın, bir oyun da var! Komanda ilə görüşdü, məşqlərdə oldu. Komandaya motivasiya verir. Mərhələ keçə biləcəyimizə inanır.

– Sabah “Keşlə” hansı cəhətlərə görə mərhələni adlamaya bilər?

– Müdafiə səhvindən qol buraxmağa haqqımımz yoxdur. Arxa xəttdə ayıq-sayıq olmalıyıq. Hücum xəttində isə daha yaxşı çıxış etməliyik. Məncə, geridönüş etmək olar.

Yuri Maksimov ayrılanda sizə oyunla bağlı hansısa göstərişlər verdi? “Baltsan”ı necə mübarizədən kənarlaşdırmaq haqda sizinlə söhbəti oldumu?

– O, sağollaşdı və uğurlar arzuladı. Amma oyunla bağlı heç nə demədi.

– Sabah baş məşqçi kimi avrokuboklarda ilk oyuna çıxacaqsınız. Təcrübəli Yuri Maksimovdan nələr öyrənmisiz?

– Onun özünə uyğun oyun sistemi var. Ondan götürəsi şeylər çoxdur. Hər məşqçidən nəsə götürməyə çalışıram. Maksimov hücum futboluna üstünlük verirdi.

– Sabah müsbət nəticə qazansaz, postunuzda qala bilərsiz?

– Bu haqda heç nə bilmirəm. Rəhbərlik qərar verəcək.