"Xəzər Lənkəran"ın baş məşqçisi Yunis Hüseynovun Korner.az saytına müsahibəsi
– Premyer Liqanın son turunda autsayder “Turan”a məğlub oldunuz. Bu oyunla bağlı fikirlərinizi bilmək istəyərdim.
"Turan"la matçımız bərbad oldu və sonda də məğlub olduq. Heç istəməzdik belə olsun. Ancaq neynəmək olar? Olacağa çarə yoxdu.
– "Xəzər Lənkəran"da nə baş verir?
Komanda uğursuzluq zolağına düşüb. Hələki burdan çıxa bilmirik. Ancaq ümidimizi itirmirik və bunun öhdəsindən gələcəyimizə əminik. İnşallah tez bir zamanda bunun öhdəsindən gələcəyik.
– "Simurq" məğlubiyyətindən sonra istefa verdiyinizi açıqladız. Lakin rəhbərlik bunu qəbul etmədi. "Simurq" məğlubiyyətindən sonra Tovuzda da yenildiz. Rəhbərlik bununla bağlı sizə hər hansı bir etiraz və ya iradını bildiribmi?
Düzdü, komanda uduzanda narazılıq olur. Elə şey ola bilməz ki, bu qədər uğursuzluqdan sonra narazılıq olmasın. Etiraf edim ki, narazılıq var. Bunu dərk eləmək lazımdı. Sadəcə işləmək lazımdı. Bu “uğursuzluq zolağı”ndan çıxmalıyıq.
– “Turan”la oyunda iki futbolçunuz qırmızı vərəqə aldı.
– Belə bir şey deyə bilmərəm. Ruslana qırmızı vərəqə verilməyə bilərdi. Amma Elnura verilən "qırmızı" doğru qərardı.
– Oyundan sonra baş hakim Rəhim Həsənovun qərarına etirazınızı bildirmişdiz.
– Ruslanın qırmızı vərəqə alması ilə bağlı etiraz bildirmişəm ki, hakim orda elə ağır cəza verməyə bilərdi. Ruslan Abışov qəsdən oyunçunu vuran bir futbolçu deyil. Xarakterli futbolçular var ki, meydançada onlara qırmızı vərəqə vermək düzgündü. Ancaq Abışov bilərəkdən yox görməyərəkdən o hərəkəti elədi. Adi oyun epizodu idi. Qırmızı vərəqə çox ağır cəza oldu.
– Bəs köməkçiləriniz Zakir Mahmudov, Zaur Ramazanov, Alim Qurbanovun komandadan göndərilməsinə münasibətiniz necədi?
Mən bu haqda nəsə deyə bilmərəm. Bu qərarı rəhbərlik verib.
– Bəlkə futbolçular arasında sizə qarşı hər hansı bir qruplaşma var?
Qruplaşma? İnanmaram. Bunların hamısı boş söhbətlərdir.
Röya Kərimli
