Avropa Liqasının ikinci təsnifat mərhələsinin ilk oyunu çərçivəsində sabah öz meydanında Polşanın “Lex” klubunu qəbul edəcək “Xəzər Lənkəran”ın baş məşqçisi Yunis Hüseynov bu gün oyunqabağı mətbuat konfransı keçirib.
– Sabah qarşılaşacağınız “Lex”lə oyuna hazırlıq necə keçdi?
Komanda yaxşı hazırlıq keçib, futbolçulardan razıyam. Düşərgədə yüksək ab-hava var.
– Yəqin ki, rəqibin məşqi və oyunlarını izləmisiniz…
Təbii ki onların oyunlarına baxmışam. “Lex”in güclü və zəif yerlərini bilirik.
– "Lex"in zəif və güclü cəhətləri hansıdır?
Onu indi deməyəcəm. Bu haqda futbolçularla söhbətim olub. Məndə mərhələ keçməyə inam var. İnşallah, sabah yaxşı nəticə qazanarıq.
– Yeni futbolçu transfer etmək mümkün olmadı?
3 futbolçu ilə danışdıq. Amma son anda razılaşmadıq. Transfer çalışmalarımız davam edir, hər gün danışırıq. Elə futbolçu var ki, klubu ilə müqaviləsi davam edir. Siz də bilirsiz ki, bizə futbolçu lazımdı. Bu istiqamətdə işlər davam edir.
– Əksər hallarda qalib heyəti dəyişmirlər. Yəqin ki, sabahkı oyunun start heyəti artıq sizin üçün məlumdur.
Yox, hələlik ilk dəqiqələrdən kimi meydana buraxacağım bəlli deyil. Bunu sabah oyundan əvvəl müəyyənləşdirəcəm.
– “Lex”ə qarşı necə oynamağı planlaşdırırsınız?
Hər halda, “Lex” “Nomme Kalyu” deyil. Bu dəfəki rəqibimiz güclüdür və buna uyğun taktika quracağıq.
– Sabahkı qarşılaşmada sizi hansı nəticə razı salacaq?
Ancaq qələbə. Bütün məşqçilər kimi, məni də qələbə qane edəcək. Sabah qol buraxmamalıyıq. Əgər mərhələ keçmək istəyiriksə, qol buraxmamalıyıq
