“Qəbələ” – “Kəpəz” matçının yayımının dayandırılmasına “CBC Sport” telekanalının rəhbəri İlham Rüstəmov göstəriş verib.
Korner.az-ın məlumatına görə, bunu Rüstəmov özünün feysbuk səhifəsində yazıb.
Baş direktor buna səbəb kimi keyfiyyətli məhsul satmaq istədiklərini göstərib: “Qəbələ” – “Kəpəz” matçının yayımı mənim göstərişimlə dayandırdıq. Oyunu nəyinsə xatirinə göstərməli olduğumuzu hesab edirsinizsə, bu, sizin probleminizdir. Biz yalnız keyfiyyətli məhsul göstərəcəyik. Matçın keçirilib-keçirilməməyinə dair qərarlar qəbul edənlərin yerinə cavabdeh deyiləm. Sadəcə, göstərməyəcəyəm. Duman çəkilən kimi yayımı bərpa etdik və matçın qalanını göstərdik. Bütün qolları da “tuta bildik”. Bu o deməkdir ki, qapını təkcə biz yox, futbolçular da görmürdü”.
Qeyd edək ki, sözügedən qarşılaşma oktyabrın 31-də qonaqlar 1:0 hesabı ilə öndə ikən 29-cu dəqiqədə dumanlı hava şəraiti səbəbilə dayandırılmış, ertəsi gün davam etdirilmişdi. Lakin ertəsi gün də Qəbələ şəhər stadionunda duman olduğundan “CBC Sport” ilk yarının sonlarınadək yayımı versə də, fasilə ərəfəsində dayandırıb. Duman çəkildikdən sonra isə yayım bərpa olunub.
